മേജർ രാധിക സെൻ; യുഎന്നിൽ ഇന്ത്യൻ സൈന്യത്തിന്റെ അഭിമാനം; എഞ്ചിനീയറിംഗിൽ ബിരുദം, പിന്നാലെ രാജ്യസേവനത്തിലേക്ക്

ഐക്യരാഷ്‌ട്രസഭയോളം അഭിമാനത്തിലാണ് ഇന്ത്യൻ സൈന്യം. ‘യുഎൻ ജെൻഡർ അഡ്വക്കേറ്റ് ഓഫ് ഇയർ അവാർ‍ഡ്’ ലഭിച്ചിരിക്കുകയാണ് ഐക്യരാഷ്‌ട്ര സഭയുടെ സമാധാനസേനയുടെ ഭാ​ഗമായ ഇന്ത്യൻ വനിതാ അം​ഗമായ മേജർ രാധിക സെന്നിന്. സ്ത്രീകൾക്കും പെൺകുട്ടികൾ‌ക്കും വേണ്ടി സംസാരിച്ചതിനും പ്രവർത്തിച്ചതിനുമാണ് നേട്ടം. യു.എൻ. ദൗത്യത്തിന്റെ ഭാഗമായി കോംഗോയിലാണ് മേജർ രാധിക സേവനമനുഷ്ടിച്ചത്.

സ്ത്രീകളുടെ യുവാക്കളുടെയും സുരക്ഷ ഉറപ്പാക്കാൻ കമ്യൂണിറ്റികൾക്ക് രൂപം നൽകിയ രാധിക, പ്രാദേശിക സുരക്ഷയും സമാധാനവും ഉറപ്പിക്കുന്നതിൽ വലി‌യ സ്വാധീനം ചെലുത്തിയതായി യുഎൻ വിലയിരുത്തി. ഇത്തരം കമ്യൂണിറ്റികൾ വഴി സ്ത്രീകളും യുവാക്കളും അവരുടെ സുരക്ഷാ ആശങ്കകൾ പങ്കുവയ്‌ക്കുകയും യുഎൻ ദൗത്യസംഘത്തിന് ഇവരിലേക്ക് വേ​ഗത്തിൽ എത്തിപെടാനുള്ള വഴിയൊരുക്കുകയും ചെയ്തു. ഇത്തരം ഇടപെടലുകൾ ദൗത്യസേനയുടെ പ്രവർത്തനം പ്രവർത്തനം എളുപ്പമാക്കുകയും ചെയ്തിരുന്നു.

യുഎൻ സമാധാന സേനാം​ഗങ്ങൾക്കായുള്ള അന്താരാഷ്‌ട്ര ദിനമായ മേയ് 30-ന് യു.എൻ സെക്രട്ടറി ജനറൽ അൻറോണിയോ ഗുട്ടെറസിൽ നിന്ന് പുരസ്കാരം ഏറ്റുവാങ്ങും. 2023 മാർച്ച് മുതൽ 2024 ഏപ്രിൽ വരെയാണ് . ഡെമോക്രാറ്റിക് റിപ്പബ്ലിക് ഓഫ് കോംഗോയിലെ യുണൈറ്റഡ് നേഷൻസ് ഓർഗനൈസേഷൻ സ്റ്റെബിലൈസേഷൻ മിഷനിൽ ഇന്ത്യൻ റാപ്പിഡ് ഡിപ്ലോയ്‌മെൻറ് ബറ്റാലിയന്റെ കമാൻഡറായി രാധിക സെൻ നിയമിതയായത്.

2016-ലാണ് മേജർ രാധിക ഇന്ത്യൻ സൈന്യത്തിൽ ചേർ‌ന്നത്. ബയോടെക്‌നോളജി എഞ്ചിനീയറിംഗിൽ ബിരുദം നേടിയ ഇവർ ബോംബെ ഐ.ഐ.ടി.യിൽ പഠിക്കുമ്പോഴാണ് സായുധ സേനയുടെ ഭാ​ഗമാകാൻ തീരുമാനിച്ചത്. അങ്ങനെയാണ് ഇന്ത്യൻ റാപ്പിഡ് ഡിപ്ലോയ്‌മെൻറ് ബറ്റാലിയനുമായുള്ള എൻഗേജ്‌മെൻറ് പ്ലാറ്റൂൺ കമാൻഡറായി 2023 മാർച്ചിൽ മോസ്‌കോയിൽ എത്തുന്നത്. നിലവിൽ ഐക്യരാഷ്‌ട്രസഭയുടെ സമാധാന സേനയിൽ 124 വനിതാ സൈനികരാണ് ഇപ്പോൾ സേവനമനുഷ്ഠിക്കുന്നത്.

മേജർ സുമൻ ഗവാനിയ്‌ക്കുശേഷം മിലിറ്ററി ജെൻഡർ അഡ്വക്കേറ്റ് പുരസ്‌കാരം ലഭിക്കുന്ന രണ്ടാമത്തെ ഇന്ത്യക്കാരിയാണ് മേജർ രാധിക. ദക്ഷിണ സുഡാനിലെ സമാധാനദൗത്യത്തിന്റെ ഭാ​ഗമായിരുന്നു 2019-ൽ പുരസ്കാരം ലഭിച്ച സുമൻ ​ഗവാനി.

2016-ലാണ് യുഎൻ ‘മിലിറ്ററി ജെൻഡർ അഡ്വക്കേറ്റ് ഓഫ് ദി ഇയർ അവാർഡ്’ ആരംഭിച്ചത്. സ്ത്രീകൾ, സമാധാനം, സുരക്ഷ എന്നിവയെക്കുറിച്ചുള്ള യു.എൻ സുരക്ഷാ കൗൺസിൽ പ്രമേയത്തിൽ 1,325-ന്റെ തത്വങ്ങൾ പ്രോത്സാഹിപ്പിക്കുന്നവർക്കാണ് പുരസ്കാരം സമ്മാനിക്കുക. സമാധാന പ്രവർത്തനങ്ങളിൽ നിന്നും ഫോഴ്‌സ് കമാൻഡർമാരും മിഷൻ മേധാവികളും നാമ നിർദ്ദേശം ചെയ്യുന്ന വ്യക്തികളിൽ നിന്നാണ് അവാർഡ് ജേതാവിനെ തിരഞ്ഞെടുക്കുന്നത്.