നാഴികക്കല്ല് പിന്നിട്ട് ഇന്ത്യൻ ബഹിരാകാശ രംഗം. ഇന്ത്യൻ സ്റ്റാർട്ടപ്പിന്റെ റോക്കറ്റായ അഗ്നികുൽ കോസ്മോസ് വിക്ഷേപണം വിജയകരമായി. ഇന്ത്യയിൽ ആദ്യമായി സെമി ക്രയോജനിക് എഞ്ചിൻ ഉപയോഗിച്ച റോക്കറ്റ് കൂടിയാണ് അഗ്നികുൽ കോസ്മോസ്. ലോകത്തിലെ ആദ്യത്തെ സിംഗിൾ യൂണിറ്റ് 3D പ്രിന്റഡ് എഞ്ചിനായ അഗ്നിലെറ്റ് എഞ്ചിനും ഈ റോക്കറ്റിൽ വിന്യസിച്ചിട്ടുണ്ട്. മൂന്നേ മൂന്ന് ദിവസം മാത്രമെടുത്താണ് എഞ്ചിൻ നിർമിക്കാൻ ആവശ്യമായി വന്നത്.
ഇന്ത്യയിലെ ഒരു സ്വകാര്യ കമ്പനി ഇത് രണ്ടാം തവണയാണ് റോക്കറ്റ് വിക്ഷേപണം നടത്തുന്നത്. ‘SoRTed-01’ എന്ന് പേരിട്ട ദൗത്യമാണ് വിജയിച്ചത്. ശ്രീഹരിക്കോട്ടയിലെ വിക്ഷേപണ തറയിലെ അഗ്നികുൽ ലോഞ്ച് പാഡ്-1 ലായിരുന്നു വിക്ഷേപണം. ഭാവി പ്രവർത്തനങ്ങൾക്ക് മുന്നോടിയായി 2022-ൽ അഗ്നികുൽ കോസ്മോസ് സ്വന്തമായി ലോഞ്ച് പാഡും മിഷൻ കൺട്രോൾ സെൻ്ററും സ്ഥാപിച്ചു. ഭാവിയിൽ മറ്റ് സ്വകാര്യ കമ്പനികൾക്കും വിക്ഷേപണം നടത്താൻ സാധിക്കും.
എട്ട് കിലോമീറ്റർ ഉയരത്തിൽ സഞ്ചരിച്ച് 30 കിലോമീറ്റർ അകലെ ബംഗാൾ ഉൾക്കടലിലാണ് അഗ്നികുൽ പതിച്ചത്. ചെന്നൈ ആസ്ഥാനമായുള്ള ബഹിരാകാശ സ്റ്റാർട്ടപ്പാണ് അഗ്നികുൽ കോസ്മോസ്.
Congratulations @AgnikulCosmos for the successful launch of the Agnibaan SoRTed-01 mission from their launch pad.
A major milestone, as the first-ever controlled flight of a semi-cryogenic liquid engine realized through additive manufacturing.@INSPACeIND
— ISRO (@isro) May 30, 2024
വിക്ഷേപണ വിജയത്തിന് പിന്നാലെ ഐഎസ്ആർഒ ദൗത്യത്തെ അഭിനന്ദിച്ചു. വിക്ഷേപണത്തെ ‘പ്രധാന നാഴികക്കല്ല്’ എന്നാണ് ഇസ്രോ വിശേഷിപ്പിച്ചത്. നാല് തവണ റദ്ദാക്കിയതിന് ശേഷമാണ് റോക്കറ്റ് വിജയകരമായി വിക്ഷേപിച്ചത്.
