തിരുവനന്തപുരം: ലോക്സഭാ തെരഞ്ഞെടുപ്പിൽ 20 ശതമാനത്തോളം വോട്ട് നേടി ബിജെപി കേരളത്തിൽ വരവറിയിച്ചെന്ന് ബിജെപി കേരള പ്രഭാരി പ്രകാശ് ജാവ്ദേക്കർ. ബിജെപിയ്ക്ക് വോട്ട് ചെയ്താൽ ദേശീയ രാഷ്ട്രീയത്തോടൊപ്പം എത്താമെന്നാണ് തൃശൂർ നൽകുന്ന സന്ദേശമെന്ന് ജാവ്ദേക്കർ പറഞ്ഞു. മാദ്ധ്യമപ്രവർത്തകരോട് സംസാരിക്കവെയാണ് അദ്ദേഹം ഇക്കാര്യം വ്യക്തമാക്കിയത്.
കെ മുരളീധരൻ രാഷ്ട്രീയത്തിൽ നിന്ന് വിരമിക്കുന്നുവെന്ന് പ്രഖ്യാപിച്ചത് സുരേഷ് ഗോപിയുടെ വിജയത്തിന്റെ ഇംപാക്ടാണ്. പരിശ്രമത്തിന്റെ ഫലമാണ് സുരേഷ് ഗോപിയുടെ വിജയം. സംസ്ഥാനത്ത് നേരിയ വോട്ട് വ്യത്യാസത്തിലാണ് ബിജെപിയ്ക്ക് രണ്ട് സീറ്റ് നഷ്ടമായത്. ഇത്രയും വോട്ട് നേടാൻ സാധിച്ചതിൽ ഞങ്ങൾക്ക് വളരെയധികം സന്തോഷമുണ്ട്.
ദേശീയ തലത്തിൽ മാറ്റമുണ്ടാകുന്ന അതേ സമയത്തായിരിക്കും കേരളത്തിൽ സംഘടനാ തലത്തിലും മാറ്റം ഉണ്ടാവുക. കേരളത്തിൽ പ്രത്യേകിച്ച് മാറ്റങ്ങൾ വരുത്തില്ല. സംസ്ഥാനത്തെ കോർപ്പറേഷൻ, മുനിസിപ്പൽ, പഞ്ചായത്ത് തുടങ്ങിയ തദ്ദേശ തെരഞ്ഞെടുപ്പുകളിൽ മികച്ച പ്രകടനം കാഴ്ചവക്കുക എന്നതാണ് ബിജെപിയുടെ അടുത്ത ലക്ഷ്യം. അതിന് വേണ്ടി കൂടുതൽ ശ്രദ്ധ കേന്ദ്രീകരിച്ച് പ്രവർത്തിക്കുമെന്നും പ്രകാശ് ജാവ്ദേക്കർ പറഞ്ഞു.
