മൂന്നാം മോദിസർക്കാരിന്റെ മന്ത്രിസഭയിൽ കേന്ദ്രമന്ത്രിയായി അധികാരമേറ്റ സുരേഷ് ഗോപിക്ക് ആശംസകളുമായി മോഹൻലാൽ. സുരേഷ് ഗോപിയുടെ മന്ത്രിസ്ഥാനത്തിൽ വളരെയധികം സന്തോഷമുണ്ടെന്നും സിനിമാ മേഖലയ്‌ക്ക് കൂടി വേണ്ടി അദ്ദേഹം പ്രവർത്തിക്കുമെന്ന് പ്രതീക്ഷിക്കുന്നുവെന്നും മോഹൻലാൽ പ്രതികരിച്ചു.
‘എന്റെ അടുത്ത സുഹൃത്തും സഹപ്രവർത്തകനുമായി സുരേഷ് ഗോപിയ്‌ക്ക് എന്റെ ആശംസകൾ അറിയിക്കുന്നു. അദ്ദേഹം ചെയ്തിട്ടുള്ള ഒട്ടേറെ സാമൂഹ്യപ്രവ‌ർത്തനങ്ങൾ നേരിട്ട് കണ്ടിട്ടുള്ളതാണ്. അതിനെല്ലാമുള്ള അംഗീകാരമാണ് ഇതെന്നാണ് ഞാൻ വിശ്വസിക്കുന്നത്. നമ്മുടെ സിനിമാ മേഖലയ്‌ക്ക് തന്നെ വളരെ അഭിമാനകരമായ നിമിഷമാണിത്. കേരളത്തിൽ നിന്നും തെരഞ്ഞെടുക്കപ്പെട്ടുള്ള ജോർജ് കുര്യനും എന്റെ അഭിനന്ദനങ്ങൾ അറിയിക്കുന്നു’- മോഹൻലാൽ പറഞ്ഞു.
