കൊച്ചി: കേന്ദ്ര മന്ത്രിസഭയിലെ കേരളത്തിലെ പ്രാതിനിധ്യത്തെ സ്വാഗതം ചെയ്ത് സിറോ മലബാർ സഭ. സുരേഷ് ഗോപിയെയും ജോർജ് കുര്യനെയും ഉൾപ്പെടുത്തിയതിൽ സന്തോഷമെന്നും പത്രക്കുറിപ്പിൽ വ്യക്തമാക്കി. കേന്ദ്ര സർക്കാരിന്റെ രാഷ്ട്ര നിർമാണ യജ്ഞങ്ങൾക്ക് പിന്തുണ വാഗ്ദാനം ചെയ്യുന്നതായും സഭ അറിയിച്ചു.
സിറോമലബാർ സഭയുടെ പബ്ലിക് അഫയേഴ്സ് കമ്മിറ്റിയാണ് വാർത്താക്കുറിപ്പിറക്കിയത്. മതേതര മൂല്യങ്ങൾ ഉയർത്തി, ന്യൂനപക്ഷ അവകാശങ്ങൾ സംരക്ഷിച്ച് മുന്നോട്ട് പോകാൻ സാധിക്കട്ടെയെന്നും കുറിപ്പിലുണ്ട്.
“ഭരണഘടനാ തത്വങ്ങൾ അടിസ്ഥാനമാക്കിയതും മതേതര മൂല്യങ്ങൾ ഉയർത്തിപ്പിടിച്ചും രാഷ്ട്രത്തിന്റെ ബഹുസ്വരതയും ന്യൂനപക്ഷ വിഭാഗങ്ങളുടെ അവകാശങ്ങളും സംരക്ഷിച്ച് കൊണ്ടും രാഷ്ട്രത്തെ കൂടുതൽ വികസനത്തിലേക്കും സാമൂഹിക പുരോഗതിയിലേക്കും നയിക്കാൻ പുതിയ സർക്കാരിന് സാധിക്കട്ടെ. ഭാരതത്തിന്റെ നവോത്ഥാനത്തിനും സാംസ്കാരിക പുരോഗതിക്കും വിദ്യാഭ്യാസ നേട്ടങ്ങൾക്കും സ്വതന്ത്രപ്രാപ്തിക്കും നിസ്തുല സംഭാവനകൾ നൽകിയിട്ടുള്ള രാഷ്ട്ര നേതാക്കളുടെ പ്രവർത്തന ശൈലി ഈ സർക്കാരിനും തുടരാൻ സാധിക്കട്ടെയെന്ന് ആശംസിക്കുന്നു”- വാർത്താക്കുറിപ്പിൽ പറയുന്നു.
