ന്യൂഡൽഹി: മൂന്നാം എൻഡിഎ സർക്കാരിന്റെ സത്യപ്രതിജ്ഞാ ചടങ്ങിനിടെ കണ്ട അജ്ഞാത ജീവിയെ തിരിച്ചറിഞ്ഞതായി ഡൽഹി പൊലീസ്. ചടങ്ങ് നടക്കുന്ന വേദിക്ക് പുറകിലായി നടന്നുനീങ്ങിയ ജീവി ഏതാണെന്ന ചർച്ചയിലായിരുന്നു സമൂഹമാദ്ധ്യമങ്ങൾ. രാഷ്ട്രപതി ഭവന്റെ പുറകിലായി വനപ്രദേശമായതിനാൽ, ചടങ്ങിൽ കണ്ടത് പുലിയാണെന്ന തരത്തിലും പലരും സംശയം ഉന്നയിച്ചിരുന്നു. എന്നാൽ ഈ അഭ്യൂഹങ്ങൾക്കെല്ലാം അവസാനമിട്ടുകൊണ്ടാണ് ഡൽഹി പൊലീസ് രംഗത്തെത്തിയിരിക്കുന്നത്. പൂച്ചയാണ് വേദിയിലൂടെ മിന്നി മറഞ്ഞതെന്ന് പൊലീസ് വ്യക്തമാക്കി.
Some media channels and social media handles are showing an animal image captured during the live telecast of oath taking ceremony held at the Rashtrapati Bhavan yesterday, claiming it to be a wild animal.
— Delhi Police (@DelhiPolice) June 10, 2024
സമൂഹമാദ്ധ്യമ ചർച്ചകൾക്ക് വിരാമമിട്ടുകൊണ്ട് എക്സിലൂടെയാണ് പൊലീസ് ഇക്കാര്യം അറിയിച്ചത്. ‘രാഷ്ട്രപതി ഭവനിൽ നടന്ന സത്യപ്രതിജ്ഞാ ചടങ്ങിന്റെ തത്സമയ സംപ്രേഷണത്തിനിടെ കടന്നുപോയ ജീവി വന്യമൃഗമാണെന്ന് ചില മാദ്ധ്യമങ്ങൾ റിപ്പോർട്ട് ചെയ്യുന്നു. എന്നാൽ ഈ വസ്തുത തെറ്റാണ്. ക്യാമറയിൽ പതിഞ്ഞ മൃഗം വീട്ടിൽ വളർത്തുന്ന പൂച്ചയാണ്. ദയവായി ഇത്തരം വ്യാജപ്രചരണങ്ങൾ നടത്തരുത്’- ഡൽഹി പൊലീസ് എക്സിൽ കുറിച്ചു.
These facts are not true, the animal captured on camera is a common house cat. Please don’t adhere to such frivolous rumours.
— Delhi Police (@DelhiPolice) June 10, 2024
വീഡിയോ പുറത്തുവന്നതിന് പിന്നാലെ പലവിധ കമന്റുകളാണ് പ്രത്യക്ഷപ്പെട്ടിരുന്നത്. വീഡിയോ എഡിറ്റ് ചെയ്തതാണോ എന്നായിരുന്നു പലരുടേയും സംശയം. ചിലർ വലിയ പൂച്ചയാകാമെന്ന ഊഹം പങ്കുവച്ചിരുന്നു. എന്നാൽ മറ്റ് ചിലർ വാലും നടത്തവുമൊക്കെ കണ്ടിട്ട് പുലിയാകാനാണ് സാധ്യതയെന്നായി. ഒറ്റ നോട്ടത്തിൽ പുലിയാണോ പൂച്ചയാണോ അതോ ഇനി നായയാണോ എന്ന് പോലും തോന്നിക്കുന്ന മൃഗത്തിന്റെ അവ്യക്തമായ ദൃശ്യങ്ങളാണ് 15 സെക്കന്റ് മാത്രം ദൈർഘ്യമുള്ള വീഡിയോയിലുള്ളത്.
