തിരുവനന്തപുരം: കോഴിക്കോട് മെഡിക്കൽ കോളേജ് ആശുപത്രിയിലെ പ്രസവ ശസ്ത്രക്രിയക്കിടെ വയറ്റിൽ കത്രിക കുടുങ്ങിയ കേസിൽ 3 പ്രതികൾക്ക് ജാമ്യം. കോടതിയിൽ ഹാജരായ മൂന്ന് പ്രതികൾക്കാണ് ജാമ്യം ലഭിച്ചിരിക്കുന്നത്. രണ്ടാം പ്രതി ഡോക്ടർ ഷഹന കോടതിയിൽ ഹാജരായിരുന്നില്ല. ഇവർക്ക് ജാമ്യം ലഭിച്ചിട്ടില്ല.
കേസിലെ ഒന്നാം പ്രതിയായ കണ്ണൂർ തളിപ്പറമ്പ് സ്വദേശി ഡോ. സികെ രമേശൻ മൂന്നും നാലും പ്രതികളും സ്റ്റാഫ് നേഴ്സുമാരുമായ പെരുമണ്ണ സ്വദേശി രഹന, ദേവഗിരി സ്വദേശി മഞ്ചു എന്നിവർക്കാണ് കോടതി ജാമ്യം അനുവദിച്ചത്. കഴിഞ്ഞ മാസം കോടതി കേസ് പരിഗണിക്കവെ ഇവർ ഹാജരായിരുന്നില്ല. പകരം അവധി അപേക്ഷ നൽകുകയായിരുന്നു. തുടർന്നാണ് ഇന്ന് കോടതി വീണ്ടും കേസ് പരിഗണിക്കുന്നത്.
അതേസമയം പരാതിക്കാരിയായ ഹർഷിന ഇപ്പോഴും നീതിക്കായുള്ള പോരാട്ടത്തിലാണ്. 2017 നവംബർ 30-നാണ് കോഴിക്കോട് മെഡിക്കൽ കോളേജ് ആശുപത്രിയിൽ ഹർഷിന പ്രസവ ശസ്ത്രക്രിയയ്ക്ക് വിധേയമായത്. ശസ്ത്രക്രിയക്കിടെ ഉപകരണം വയറ്റിൽ കുടുങ്ങിയെന്നാണ് ഹർഷിനയുടെ പരാതി. അതിനുശേഷം നിരവധി തവണ പരാതി സമർപ്പിക്കുകയും സമരങ്ങൾ നടത്തുകയും ചെയ്തിരുന്നു. ഇതിനെ തുടർന്നാണ് നാല് പേരെ പ്രതികളാക്കി പൊലീസ് കുറ്റപത്രം സമർപ്പിച്ചത്.
