നിക്ഷേപത്തിന് മികച്ച ഇടം അന്വേഷിക്കുന്നവർക്ക് പോസ്റ്റോഫീസിലേക്ക് സ്വാഗതം. രാജ്യത്ത് തന്നെ മുതിർന്ന പൗരന്മാർക്ക് ലഭിക്കുന്ന മികച്ച നിക്ഷേപ പദ്ധതി അവിടെയുണ്ട്. 55 വയസ് കഴിഞ്ഞവർക്ക് ചേരാൻ കഴിയുന്ന ആകർഷകമായ റിട്ടേൺ ലഭിക്കുന്ന ഒരു പോസ്റ്റ് ഓഫീസ് സ്കീമാണ് സീനിയർ സിറ്റിസൺ സേവിംഗ്സ് സ്കീം.
ഒറ്റത്തവണയായി നിക്ഷേപിക്കാവുന്ന ഈ സ്കീമിന്റെ കാലാവധി അഞ്ചുവർഷമാണ്. 55 വയസ്സ് കഴിഞ്ഞ് സർവീസിൽ നിന്നും വിരമിച്ചവർക്കും 50 വയസ് കഴിഞ്ഞ് സേനയിൽ നിന്ന് വിരമിച്ചവർക്കും ഇതിൽ ചേരാവുന്നതാണ്. കുറഞ്ഞത് 1,000 രൂപ അടച്ച് പോസ്റ്റ് ഓഫീസ് ശാഖകളിൽ സീനിയർ സിറ്റിസൺ സേവിംഗ്സ് സ്കീം അക്കൗണ്ട് തുടങ്ങാം. 30 ലക്ഷം വരെ നിക്ഷേപിക്കാവുന്നതാണ്.
പ്രതിവർഷം ഒന്നര ലക്ഷം വരെയുള്ള നിക്ഷേപത്തിന് നികുതി ഇളവ് ലഭിക്കും. മൂന്ന് മാസം കൂടുമ്പോൾ പലിശവരുമാനം ലഭിക്കുന്ന തരത്തിലാണ് സ്കീം. അടിയന്തര ഘട്ടത്തിൽ നിക്ഷേപം തുടങ്ങി ഒരു വർഷത്തിനകം പലിശയില്ലാതെയും ഒരു വർഷത്തിനു ശേഷം 1.5 ശതമാനം കിഴിവോടെയും രണ്ട് വർഷത്തിനു ശേഷം ഒരു ശതമാനം കിഴിവോടെയും തുക പിൻവലിക്കാം.
പത്ത് ലക്ഷം രൂപ നിക്ഷേപിച്ചാൽ മൂന്ന് മാസം കൂടുമ്പോൾ പലിശ വരുമാനമായി 20,500 രൂപ ലഭിക്കും. അതായത് പ്രതിവർഷം 82,000 രൂപ. കാലവധി അവസാനിക്കുന്ന മുറയ്ക്ക് നിക്ഷേപിച്ച തുക പൂർണമായി മടക്കി നൽകും. എപ്പോൾ വേണമെങ്കിലും അക്കൗണ്ട് ക്ലോസ് ചെയ്യാവുന്നതുമാണ്.
