അമരാവതി: ജൂൺ 13 ന് വ്യാഴാഴ്ച അമരാവതിയിലെ സെക്രട്ടേറിയറ്റിൽ അധികാരമേറ്റയുടനെ ആന്ധ്രപ്രദേശ് മുഖ്യമന്ത്രി നാരാ ചന്ദ്രബാബു നായിഡു ഒപ്പുവെച്ചത് തിരഞ്ഞെടുപ്പ് വാഗ്ദാനവുമായി ബന്ധപ്പെട്ട അഞ്ച് ഫയലുകൾ. സംസ്ഥാനത്തെ 16,347 അധ്യാപക തസ്തികകൾ നികത്തുന്നതിനുള്ള ഡിഎസ്സി വിജ്ഞാപനം, മുൻ വൈഎസ്ആർസിപി സർക്കാർ കൊണ്ടുവന്ന “എപി ഭൂമിയുടെ ഉടമസ്ഥാവകാശ നിയമം” പിൻവലിക്കൽ, മുതിർന്ന പൗരന്മാർക്കും വിധവകൾക്കുമുള്ള സാമൂഹിക സുരക്ഷാ പെൻഷൻ 3,000 രൂപയിൽ നിന്ന് 4,000 രൂപയായും വികലാംഗർക്ക് 3,000 രൂപയിൽ നിന്ന് 6,000 രൂപയായും ഉയർത്തുക, ഗുണമേന്മയുള്ള ഭക്ഷണം 5 രൂപയ്ക്ക് നൽകുന്നതിന് സംസ്ഥാനത്തുടനീളമുള്ള അന്ന കാൻ്റീനുകൾ പുനരുജ്ജീവിപ്പിക്കുക, സംസ്ഥാനത്തെ യുവാക്കളുടെ നൈപുണ്യശേഷി ഉയർത്തുന്നതിനായി ഒരു നൈപുണ്യ സെൻസസ് നടത്തുക എന്നിവയാണ് ആ ഫയലുകൾ
വേദമന്ത്രങ്ങൾക്കിടയിൽ അദ്ദേഹത്തിന്റെ ക്യാബിനറ്റ് മന്ത്രിമാരുടെയും ഉദ്യോഗസ്ഥരുടെയും സാന്നിധ്യത്തിൽ വൈകുന്നേരം 4.41നാണ് നായിഡു മുഖ്യമന്ത്രിയായി ചുമതലയേറ്റത്. സെക്രട്ടേറിയറ്റിലേക്കുള്ള വഴിയിലുടനീളം ശ്രീ നായിഡുവിനെ അമരാവതി കർഷകരും ടിഡിപി പ്രവർത്തകരും പുഷ്പങ്ങൾ ചൊരിഞ്ഞ് സ്വീകരിച്ചു.
ജഗന്റെ ഭൂമി തട്ടിയെടുക്കൽ നിയമമായി വിശേഷിപ്പിക്കപ്പെട്ട എപി ലാൻഡ് ടൈറ്റിൽ ആക്ട് സംസ്ഥാനത്തുടനീളമുള്ള ഭൂവുടമകളിൽ വളരെയധികം ഭയം സൃഷ്ടിച്ചിരുന്നു. വൈഎസ്ആർസിപി നേതാക്കൾ തങ്ങളുടെ ഭൂമി തട്ടിയെടുക്കുമെന്ന ഭയത്തിലാണ് കഴിഞ്ഞ അഞ്ച് വർഷമായി സംസ്ഥാനത്തെ ജനങ്ങൾ കഴിയുന്നതെന്നു ടി ഡി പി പലതവണ ആരോപിച്ചിരുന്നു. ജഗൻ അന്ന കാൻ്റീനുകൾ നിർത്തലാക്കി. ആവശ്യമെങ്കിൽ വൈഎസ്ആറിന്റെയോ ജഗന്റെയോ പേരിലേക്ക് മാറ്റി അവ പ്രവർത്തിപ്പിക്കാനുള്ള അഭ്യർത്ഥന പോലും പരിഗണിച്ചില്ല. അടുത്ത 100 ദിവസത്തിനുള്ളിൽ അന്നാ കാൻ്റീനുകൾ വീണ്ടും തുറക്കുമെന്ന് മന്ത്രിമാർ പറഞ്ഞു.
നൈപുണ്യ സെൻസസ് സംസ്ഥാനത്തെ യുവാക്കളുടെ നൈപുണ്യ നിലവാരം അളക്കാൻ സഹായിക്കും, അതുവഴി അവരുടെ കഴിവുകൾ മെച്ചപ്പെടുത്തുന്നതിനും ശരിയായ തൊഴിൽ ഉറപ്പാക്കുന്നതിനും ആവശ്യമായ നടപടികൾ കൈക്കൊള്ളാനാകും. കൂടാതെ, യുവാക്കൾക്ക് തൊഴിലില്ലായ്മ ഓണറേറിയം നൽകുമെന്ന് എൻഡിഎയും വാഗ്ദാനം ചെയ്തിരുന്നു.
അർഹരായ ആളുകൾക്ക് അവരുടെ വീട്ടുവാതിൽക്കൽ പെൻഷൻ നൽകുന്നതാണ് പുതിയ തീരുമാനം, എന്നാൽ ഏത് ഏജൻസി ആണ് ഇത് ചെയ്യുന്നത് എന്ന് സർക്കാർ ഇതുവരെ തീരുമാനിച്ചിട്ടില്ല.
മുൻ മുഖ്യമന്ത്രി വൈഎസ് ജഗൻ മോഹൻ റെഡ്ഡി തന്റെ അഞ്ച് വർഷത്തെ ഭരണത്തിൽ ഒരു ഡിഎസ്സി വിജ്ഞാപനമോ തൊഴിൽ കലണ്ടറോ പോലും നൽകുന്നതിൽ തികഞ്ഞ പരാജയമാണെന്ന് എൻ ഡി എ ആരോപിച്ചു. മുൻ സർക്കാർ കൊണ്ടുവന്ന “തൊഴിലില്ലാത്ത യുവാക്കൾക്ക് ഓണറേറിയം” എന്ന തീരുമാനം തുടരുന്നതിൽ പോലും ജഗൻ പരാജയപ്പെട്ടു.
