ലക്‌നൗ: 3D രൂപത്തിൽ ഭഗവാനുമായി ബന്ധപ്പെട്ട ചലച്ചിത്രങ്ങൾ ഭക്തർക്ക് കാണാൻ സാധിക്കുന്നതിനായി വെർച്വൽ റിയാലിറ്റി ദർശനം അവതരിപ്പിച്ച് കാശി വിശ്വനാഥ ക്ഷേത്രം. 11 മിനിട്ടും 50 സെക്കന്റും നീണ്ടു നിൽക്കുന്ന വെർച്വൽ റിയാലിറ്റി ദർശനമാണ് ക്ഷേത്രം ഒരുക്കിയത്. ഭർക്തർക്ക് ഇതൊരു വേറിട്ട അനുഭവമായിരുന്നുവെന്നും ധാരളം ഭക്തർ വെർച്വൽ റിയാലിറ്റി ദർശനം ആസ്വദിച്ചുവെന്നും ക്ഷേത്രത്തിന്റെ ചീഫ് എക്‌സിക്യൂട്ടീവ് ഓഫീസർ വിശ്വ ഭൂഷൻ മിശ്ര പറഞ്ഞു.
” ഉജ്ജയിൻ മഹാകാലേശ്വർ ക്ഷേത്രം, മാതാ വൈഷണോ ക്ഷേത്രം തുടങ്ങിയ ക്ഷേത്രങ്ങളിൽ ഇത്തരത്തിൽ പുതിയ സാങ്കേതികവിദ്യയായ 3D വെർച്വൽ റിയാലിറ്റി അവതരിപ്പിച്ചിട്ടുണ്ട്. ഭക്തർക്ക് വേറിട്ട അനുഭവം നൽകുന്ന ഇത്തരം പുത്തൻ സാങ്കേതികവിദ്യ, കാശി വിശ്വനാഥ് ക്ഷേത്രത്തിലും അവതരിപ്പിച്ചു. ഒരു മാസം നീണ്ടു നിന്ന 3 D വെർച്വൽ റിയാലിറ്റി ദർശനത്തിനടുവിലാണ് ഇത്തരത്തിലൊരു പദ്ധതി ഭക്തർക്കിടയിൽ നടപ്പിലാക്കിയത്.”- വിശ്വ ഭൂഷൻ മിശ്ര പറഞ്ഞു.
ക്ഷേത്രത്തിലെ 363 ജീവനക്കാരെയും പുരോഹിതരെയും വെർച്വൽ ദർശനം കാട്ടി അംഗീകാരം നേടിയ ശേഷമാണ്, ഭക്തർക്കായി അവതരിപ്പിച്ചത്. ജൂൺ 4 മുതൽ ജൂൺ 30 വരെ 282 ഭക്തർക്കിടയിൽ വെർച്വൽ റിയാലിറ്റിയിലൂടെ സിനിമകൾ പ്രദർശിപ്പിച്ചു. ഏവരും വളരെയധികം ആസ്വദിച്ചതായും ആവശ്യമെങ്കിൽ മറ്റു ചില വ്യത്യാസങ്ങൾ വരുത്തി വീണ്ടും പ്രദർശനം തുടരാനുള്ള പദ്ധതികൾ ക്ഷേത്രം നടപ്പിലാക്കുമെന്നും അദ്ദേഹം അറിയിച്ചു.
