അറബ് യൂട്യൂബർ ഖാലിദ് അൽ അമേരിയുടേയും കോളിവുഡ് നടി സുനെെനയുടേയും വിവാഹ നിശ്ചയം കഴിഞ്ഞതായി റിപ്പോർട്ട്. സോഷ്യൽ മീഡിയ പേജുകളിൽ വിവാഹ നിശ്ചയം കഴിഞ്ഞ ചിത്രങ്ങൾ ഇരുവരും പങ്കുവെച്ചതിന് പിന്നാലെയാണ് അഭ്യൂഹങ്ങൾ ഉയർന്നത്. വിവാഹ മോതിരം അണിഞ്ഞുള്ള രണ്ട് കെെകൾ പരസ്പരം ചേർത്തുപിടിച്ചിരിക്കുന്ന ചിത്രങ്ങളാണ് ഇരുവരും പങ്കുവച്ചത്.
വിവാഹ നിശ്ചയം കഴിഞ്ഞ ചിത്രം സുനെെന ജൂൺ അഞ്ചിനാണ് നടി ചിത്രം പങ്കുവച്ചത്. ജൂൺ 26 നാണ് ഖാലിദ് അൽ അമേരി തന്റെ ഇൻസ്റ്റാഗ്രാമിൽ സമാനമായ ചിത്രം പോസ്റ്റ് ചെയ്തത്. എന്നാൽ ഇരുവരും കൂടുതൽ വിവരങ്ങൾ പങ്കുവെച്ചിട്ടില്ല. സുനെെനയും ഖാലിദും വളരെ കാലങ്ങളായി അടുത്ത സുഹൃത്തുക്കളാണ്.
ഖാലിദ് അൽ അമേരി മലയാളികൾക്ക് ഏറെ പരിചിതനായ വ്ലോഗറാണ്. ടർബോ ചിത്രത്തിന്റെ പ്രമോഷന്റെ ഭാഗമായി മമ്മൂട്ടി ഖാലിദിന്റെ ചാനലിന് അഭിമുഖം നൽകിയിരുന്നു. ഖാലിദ് അൽ അമേരിയുടെ രണ്ടാം വിവാഹമാണ്. സൗന്ദര്യവസ്തു നിർമ്മാണ കമ്പനി ഉടമയായ സൽമ മുഹമ്മദ് ആയിരുന്നു ഖാലിദ് അൽ അമേരിയുടെ ആദ്യ ഭാര്യ. ആറുമാസം മുമ്പാണ് ഇരുവരും വേർപിരിഞ്ഞത്.
ബെസ്റ്റ് ഫ്രണ്ട്സ് എന്ന മലയാള സിനിമയിൽ സുനെെന അഭിനയിച്ചിട്ടുണ്ട്. കൂടാതെ മാസിലാമണി, കാതലിൽ വിഴുന്തേൻ, നീർപറവെെ, തെറി തുടങ്ങിയ ചിത്രങ്ങളിലും അഭിനയിച്ചിട്ടുണ്ട്.
