ശരത് കുമാറിന്റെ മകളും നടിയുമായ വരലക്ഷ്മി ശരത് കുമാർ വിവാഹിതയായി. മുംബൈ സ്വദേശിയായ ആര്ട്ട് ഗാലറിസ്റ്റ് നിക്കോളായ് സച്ചിദേവുമായുള്ള വിവാഹം തായ്ലൻഡിൽ വച്ചായിരുന്നു നടന്നത്. ജൂലൈ 2-നായിരുന്നു തായ്ലൻഡിൽ വച്ച് ഡെസ്റ്റിനേഷൻ വെഡ്ഡിംഗ് നടന്നത്.
കഴിഞ്ഞ ദിവസം ചെന്നൈയിൽ വച്ച് സിനിമാ മേഖലയിൽ നിന്നുള്ളവർക്ക് വേണ്ടിയുള്ള വിവാഹ സത്ക്കാരവും നടന്നു. ചെന്നെയിൽ നടന്ന വിവാഹ റിസപ്ഷനിൽ ലിസി, ശോഭന, ഖുശ്ബു, രജനീകാന്ത്, തൃഷ, നന്ദമൂരി ബാലകൃഷ്ണ, എആര് റഹ്മാന്, മണിരത്നം, സുരേഷ് ഗോപി, ജാക്കി ഷ്റോഫ്, സുഹാസിനി, അറ്റ്ലീ, പ്രഭുദേവ, വിജയ് ആന്റണി, രമ്യകൃഷ്ണ, വിജയ് ആന്റണി, ബാല, ജീവ, ഐശ്വര്യ രജനീകാന്ത്, വിഷ്ണു വിശാൽ, സന്ദീപ് കിഷൻ, ലക്ഷ്മി മഞ്ചു,സിദ്ധാർത്ഥ്,ഉദയനിധി സ്റ്റാലിൻ തുടങ്ങിയ താരങ്ങൾ പങ്കെടുത്തിരുന്നു. റിസപ്ഷനെത്തിയ തെന്നിന്ത്യൻ താരങ്ങളുടെ ചിത്രങ്ങൾ സമൂഹമാദ്ധ്യമങ്ങളിൽ ഇടം പിടിച്ചിട്ടുണ്ട്.
റിസപ്ഷനിൽ ഗ്രേപ്പ് നിറത്തിലെ ലഹങ്കയായിരുന്നു വരലക്ഷ്മിയുടെ വസ്ത്രം. ഇതിനോടൊപ്പം വജ്രാഭരണങ്ങളുമായിരുന്നു വരലക്ഷ്മി ധരിച്ചിരുന്നത്. ഗ്രേപ്പും കറുപ്പും ഇടകലർന്ന ഷർവാണിയായിരുന്നു നിക്കോളായ് ധരിച്ചത്. തായ്ലൻഡിൽ നടന്ന വിവാഹത്തിന്റെ ചിത്രങ്ങൾ ഇതുവരെ പുറത്ത് വന്നിട്ടില്ല. ഇതിന് മുമ്പ് വരലക്ഷ്മിയുടെയും നിക്കോളയുടെയും ഹൽദിയുടെയും സംഗീത് ചടങ്ങിന്റെയും ചിത്രങ്ങൾ വൈറലായിരുന്നു.
ഏറെ നാളത്തെ സൗഹൃദത്തിനും പ്രണയത്തിനും ശേഷമാണ് വരലക്ഷ്മിയും നിക്കോളോയ് സച്ചിദേവും ഔദ്യോഗികമായി വിവാഹിതരാകാൻ തീരുമാനിച്ചത്. മുംബൈ ആസ്ഥാനമായുള്ള ഒരു ആർട്ട് ഗ്യാലറി ഉടമയാണ് നിക്കോളായ്. മാർച്ച് ഒന്നിനായിരുന്നു കുടുംബാംഗങ്ങളുടെ സാന്നിധ്യത്തിൽ ഇരുവരുടെയും വിവാഹ നിശ്ചയം കഴിഞ്ഞത്.
ശരത്കുമാറിന്റെയും ആദ്യഭാര്യ ഛായയുടെയും മകളാണ് വരലക്ഷ്മി, പൂജയാണ് ഇളയമകൾ. പിന്നീട് ശരത്കുമാർ രാധികയെ വിവാഹം കഴിക്കുകയായിരുന്നു.
