മനുഷ്യന് ഇൻഷുറൻസ് പരിരക്ഷ ഉറപ്പാക്കുന്നത് പോലെ തന്നെ മൊബൈൽ ഫോണിനും ഇൻഷുറൻസ് എടുത്താലോ? തമാശയാണെന്ന് തോന്നിയാലും കാര്യം അൽപം സീരിയസാണ്. ആശയവിനിമയം, ജോലി, സാമ്പത്തിക ഇടപാടുകൾ തുടങ്ങിയവയ്ക്കായി സ്മാർട്ട് ഫോണിനെയാണ് നാം ഇന്ന് ആശ്രയിക്കുന്നത്. ഈ സാഹചര്യത്തിലാണ് മൊബൈൽ ഇൻഷുറൻസ് ഉപകാരപ്പെടുക.
ഫോണിന്റെ നഷ്ടമോ കേടുപാടുകളോ പോലുള്ള സംഭവങ്ങൾക്ക് ഇൻഷുറൻസ് പരിരക്ഷ നൽകുന്നതാണ് മൊബൈൽ ഇൻഷുറൻസ്. മൊബൈൽ ഫോൺ വഴി തന്നെ ഇൻഷുറൻസ് എടുക്കാവുന്നതാണ്. ഫോൺ ഏതെങ്കിലും അവസരത്തിൽ മോഷ്ടിക്കപ്പെടുകയോ, നഷ്ടപ്പെടുകയോ ചെയ്യുന്ന അവസരത്തിൽ ഇൻഷ്വർ ചെയ്ത തുക നഷ്ടപരിഹാരമായി ലഭിക്കും.
കേടുപാടുകൾ സംഭവിച്ചാൽ നന്നാക്കി ലഭിക്കുന്നതിനും മൊബൈൽ ഇൻഷുറൻസ് സഹായിക്കുന്നു. വെള്ളം, ഈർപ്പം എന്നിവ മൂലമുണ്ടാകുന്ന ആകസ്മികമായ കേടുപാടുകൾക്ക് ഇൻഷുറൻസ് വാഗ്ദാനം ചെയ്യുന്നു. ഇയർ ജാക്കുകൾ, ചാർജിംഗ് പോർട്ടുകൾ, ടച്ച് സ്ക്രീനുകൾ എന്നിവയിലെ പ്രശ്നങ്ങൾ പോലുള്ള സാങ്കേതിക തകരാറുകൾക്കും കവറേജ് നൽകുന്നു. മുൻ പോളിസി കാലയളവിൽ ക്ലെയിമുകളൊന്നും റിപ്പോർട്ട് ചെയ്തിട്ടില്ലെങ്കിൽ പോളിസി പുതുക്കുന്ന സമയത്ത് പോളിസി ഉടമകൾക്ക് ചില ഇൻഷുറൻസ് കമ്പനികൾ നോ ക്ലെയിം ബോണസ് വാഗ്ദാനം ചെയ്യുന്നു.
എന്നാൽ ഉടമയല്ലാതെ മറ്റൊരാൾ ഉപയോഗിക്കുന്നത് വഴി സംഭവിക്കുന്ന തകരാറുകൾ, അറിഞ്ഞുകൊണ്ട് കേടുപാടുകൾ സൃഷ്ടിക്കുന്നത്, ദൂരുഹ സാഹചര്യത്തിൽ നഷ്ടപ്പെടുക തുടങ്ങിയ സാഹചര്യങ്ങളിൽ ഇൻഷുറൻസ് പരിരക്ഷ ലഭിക്കില്ലെന്നത് പ്രത്യേകം ശ്രദ്ധിക്കണം.
