എറണാകുളം: കേരളത്തിലെ പ്രഥമ ഫുട്ബോൾ ലീഗായ സൂപ്പർ ലീഗ് കേരളയുടെ കൊച്ചി ടീമിന്റെ പേര് പ്രഖ്യാപിച്ച് ഉടമയും നടനുമായ പൃഥ്വിരാജ്. ‘ഫോഴ്സാ കൊച്ചി എഫ്.സി’ എന്നാണ് ടീമിന് നൽകിയിരിക്കുന്ന പേര്. പൃഥ്വിരാജ് തന്നെയാണ് ഇക്കാര്യം സമൂഹമാദ്ധ്യമങ്ങളിലൂടെ അറിയിച്ചത്.
‘ഒരു പുതിയ അധ്യായം കുറിക്കാൻ “ഫോഴ്സാ കൊച്ചി” കാൽപന്തിന്റെ ലോകത്തിലേക്ക് വിജയം നേടാൻ ഞങ്ങൾ കളത്തിൽ ഇറങ്ങുകയാണ്. പലനാടുകളിലെ ലോകോത്തര പ്രതിഭകളെയും കൊച്ചിയുടെ സ്വന്തം ആവേശം നിറഞ്ഞ ആരാധകരെയും ഒന്നിപ്പിക്കാൻ, ഒരു പുത്തൻ ചരിത്രം തുടങ്ങാൻ!’- പൃഥ്വിരാജ് ഫെയ്സ്ബുക്കിൽ കുറിച്ചു.
കൊച്ചിയുടെ പേരില് ഇറക്കുന്ന ടീമിന് നല്ല പേര് നിർദ്ദേശിക്കാൻ ആവശ്യപ്പെട്ട് സമൂഹമാദ്ധ്യമത്തില് നേരത്തെ പൃഥ്വിരാജ് പോസ്റ്റ് പങ്കുവെച്ചിരുന്നു. ഇതിന് പിന്നാലെയാണ് പുതിയ പേര് പ്രഖ്യാപിച്ചിരിക്കുന്നത്. ഇതിഹാസ താരങ്ങളെ അണിനിരത്തികൊണ്ട് കേരളത്തില് തുടക്കം കുറിക്കുന്ന പുതിയ ഫുട്ബോള് ലീഗില് നേരത്തെ പൃഥ്വിരാജ് നിക്ഷേപം നടത്തിയിരുന്നു.
സൂപ്പര് ലീഗ് കേരള (എസ്എല്കെ) ഫുട്ബോള് ക്ലബ്ബായ കൊച്ചി പൈപ്പേഴ്സിന്റെ ഓഹരിയാണ് പൃഥ്വിരാജ് വാങ്ങിയത്. ഇതോടെ കേരളത്തിലെ പ്രൊഫഷണല് ഫുട്ബോള് ടീമിന്റെ സഹ ഉടമയാകുന്ന ആദ്യ സിനിമാ താരമായി മാറിയിരിക്കുകയാണ് പൃഥ്വിരാജ്.
