മലയാളികളുടെ അടുക്കളയിലെ പ്രധാനിയാണ് കറിവേപ്പില. രുചിക്ക് പുറമേ നിരവധി ഗുണങ്ങളാണ് കറിവേപ്പില നൽകുന്നത്. ദഹനം മെച്ചപ്പെടുത്താനും ശരീരംഭാരം കുറയ്ക്കുന്നതിലുമൊക്കെ കറിവേപ്പില വലിയ പങ്ക് വഹിക്കുന്നു.
ആവശ്യ പോഷകങ്ങളുടെയും കാത്സ്യം, ഇരുമ്പ് തുടങ്ങിയവയുടെയും കലവറയാണ് കറിവേപ്പില. ഇതിന്റെ ആൻ്റി ഓക്സിഡന്റ് ഗുണങ്ങളും അത്ഭുതപ്പെടുത്തും. മുടിയുടെ ആരോഗ്യത്തിനാവശ്യമായ അമിനോ ആസിഡുകളും ബീറ്റാ കരോട്ടിനുകളും ഇതിലടങ്ങിയിരിക്കുന്നു. ദിവസവും അഞ്ചോ ആറോ കറിവേപ്പില കഴിക്കുന്നത് നല്ലതാണെന്ന് വിദഗ്ധർ പറയുന്നു.
എന്നാൽ ഗുണമുണ്ടെന്ന് അറിഞ്ഞും അറിയാതെയും മിക്കവരും കറിവേപ്പിലയെ വലിച്ചെറിയുകയാണ് പതിവ്. കഴിക്കാനുള്ള മടിയാണ് ഇതിന് കാരണം. എന്നാൽ പോംവഴിയുണ്ട്, വെറുതെ ഇല നുള്ളി വിഭവങ്ങളിൽ ചേർക്കുന്നതിന് പകരം കിടിലൻ ചമ്മന്തിയാക്കി കഴിച്ച് നോക്കൂ. ഗുണവും പോകില്ല, ആരോഗ്യസമ്പന്നവുമാണ്. കറിവേപ്പില ചമ്മന്തിയുടെ കിടിലൻ റെസിപ്പി ഇതാ..
ചേരുവകൾ
- കറിവേപ്പില-50 ഗ്രാം
- കുരുകളഞ്ഞ വാളൻ പുളി -30 ഗ്രാം
- ഉലുവ- ഒരു ടേബിൾ സ്പൂൺ
- ചെറു ജീരകം-അര ടീസ്പൂൺ
- കടലപരിപ്പ് -രണ്ട് ടേബിൾ സ്പൂൺ
- കായപ്പൊടി -1/2 ടീസ്പൂൺ
- മുളക്പ്പൊടി-4 ടേബിൾ സ്പൂൺ
- മഞ്ഞൾപ്പൊടി- ഒരു ടീസ്പൂൺ
- ശർക്കര പൊടിച്ചത്- 2 ടേബിൾ സ്പൂൺ
- വിനാഗിരി-3 ടേബിൾ സ്പൂൺ
- എള്ളെണ്ണ
- കടുക്
- ഇഞ്ചി
- വെളുത്തുള്ളി
- കാന്താരി മുളക്
- കറിവേപ്പില
- ഉപ്പ്
തയ്യാറാക്കുന്ന വിധം
കറിവേപ്പില കഴുകി ഉണക്കിയെടുക്കണം. ഉണങ്ങിയതിന് ശേഷം മാത്രം ഇലകൾ അടർത്തുക. കുരു കളഞ്ഞ വാളൻ പുളിയിലേക്ക് ഒരു കപ്പ് ചൂടുവെള്ളത്തിൽ കുതിർത്തെടുക്കുക.
ചട്ടിയിൽ എള്ളെണ്ണ ഒഴിച്ച് ചൂടായി വരുമ്പോൾ ഉലുവ, ചെറുജീരകം, കടലപ്പരിപ്പ് എന്നിവ ചേർത്ത് മൂപ്പിക്കുക. ഇതിലേക്ക് വെളുത്തുള്ളി തൊലി കളഞ്ഞതും കറിവേപ്പിലയും ചേർത്ത് വറുത്തെടുക്കുക. ഇതിലേക്ക് മുളകുപ്പൊടി, മഞ്ഞൾപ്പൊടി എന്നിവ ചേർത്ത് മിക്സ് ചെയ്യുക. ചൂടായായ ശേഷം തീ അണയ്ക്കുക. നന്നായി തണുത്ത ശേഷം മിക്സിയിൽ ഈ കൂട്ടും പുളിയും ചേർത്ത് അരച്ചെടുക്കുക.
തുടർന്ന് വീണ്ടും ചട്ടിയിൽ എള്ളെണ്ണ ഒഴിച്ച് കടുക് മൂപ്പിക്കുക. ഇതിലേക്ക് ഇഞ്ചി,വെളുത്തുള്ളി എന്നിവ വഴറ്റുക. കാന്താരി മുളക്, കറിവേപ്പില, കായപ്പൊടി എന്നിവ ചേർത്ത് ചൂടാക്കുക. അരച്ചുവച്ച കൂട്ട് ഇതിലേക്ക് ചേർത്ത് ആവശ്യത്തിന് ഉപ്പും ചേർക്കുക. ഇതിലേക്ക് ആവശ്യമെങ്കിൽ ശർക്കര പൊടിച്ചതും വിനാഗിരിയും ചേർക്കാവുന്നതാണ്.
