സമൂഹമാദ്ധ്യമങ്ങളിൽ സജീവമായതിന് പിന്നാലെ ഭര്ത്താവ് വിഘ്നേശ് ശിവനും മക്കള്ക്കുമൊപ്പമുള്ള ചിത്രങ്ങള് എപ്പോഴും നയൻതാര സോഷ്യൽ മീഡിയയിൽ പങ്കുവക്കാറുണ്ട്. കഴിഞ്ഞ ദിവസം നയൻതാര പങ്കുവെച്ച ഒരു ചിത്രമാണ് അപ്രതീക്ഷിതമായി ചർച്ചയായത്. പ്രണയാർദ്രമായി മുഖത്തോട് മുഖം നോക്കി നിൽക്കുന്ന ചിത്രമാണ് നയൻതാര പങ്കുവച്ചിരിക്കുന്നത്.
ഒറ്റ നോട്ടത്തിൽ നോക്കുമ്പോൾ കൂടെയുള്ളത് വിഘ്നേഷ് ആണെന്ന് തോന്നുമെങ്കിലും ഒരിക്കൽ കൂടി വ്യക്തമായി ശ്രദ്ധിച്ചാൽ നടിക്കൊപ്പമുള്ളത് വിക്കി അല്ലെന്ന് മനസിലാക്കാം. ചിത്രത്തിലുള്ളത് നടൻ കവിനാണ്. പുതിയ ചിത്രത്തിൽ നയൻതാരയും കവിനും ഒന്നിക്കുന്നു എന്നതിന്റെ സൂചനയാണിത്. ലോകേഷ് കനകരാജിന്റെ സഹായിയായി പ്രവര്ത്തിച്ച വിഷ്ണു ഇടവന്റെ ചിത്രത്തിലാണ് ഇവർ ഒന്നിക്കുന്നതെന്നാണ് വിലയിരുത്തൽ.
‘ഡാഡ’ എന്ന ചിത്രത്തിലൂടെ ശ്രദ്ധേയനായ നടനാണ് കവിൻ. ടെലിവിഷന് പരമ്പരകളിലൂടെയാണ് നടനെന്ന നിലയില് കവിന് പ്രേക്ഷകശ്രദ്ധയിലേക്ക് എത്തുന്നത്. തമിഴിലെ ബിഗ്ബോസിൽ പങ്കെടുത്തതിന് ശേഷമാണ് താരം സിനിമയിലേക്ക് ചുവടുവെച്ചത്. പ്രമുഖ തമിഴ് സംവിധായകന് കാര്ത്തിക് സുബ്ബരാജിന്റെ അരങ്ങേറ്റ ചിത്രം പിസയിലൂടെ ആയിരുന്നു കവിന്റെയും സിനിമാ അരങ്ങേറ്റം.
