പാരിസ് ഒളിമ്പിക്സിൽ ഇന്ത്യയുടെ മത്സരങ്ങൾക്ക് വ്യാഴാഴ്ച തുടക്കമാകും. ആർച്ചറി, പുരുഷ- വനിതാ റാങ്കിംഗ് മത്സരങ്ങളിലാണ് ഇന്ത്യൻ താരങ്ങൾ മത്സരിക്കാനിറങ്ങുക. വനിതാ വിഭാഗത്തിൽ ദീപികാ കുമാരി, അങ്കിതാ ഭഗത്, ഭജൻ കൗർ എന്നിവരും പുരുഷ വിഭാഗത്തിൽ ധീരജ് ബൊമ്മദേവരയും ഇന്ത്യയുടെ മെഡൽ പ്രതീക്ഷകളാണ്. ടീം റാങ്കിംഗിന്റെ അടിസ്ഥാനത്തിലാണ് ഇന്ത്യക്ക് ആർച്ചറി ടീമിനങ്ങളിൽ ഒളിമ്പിക്സ് ബെർത്ത് ലഭിച്ചത്. നാഷണൽ ഒളിമ്പിക്സ് കമ്മിറ്റിയുടെ നാമനിർദേശത്തിലാണ് ദീപികാ കുമാരി യോഗ്യത നേടിയത്. വ്യക്തിഗത, ടീം, മിക്സഡ് ടീം ഇനങ്ങളിലാണ് മത്സരം.
ദീപികാ കുമാരി ലോക ആർച്ചറി ചാമ്പ്യൻഷിപ്പിൽ വെള്ളി മെഡൽ നേടിയിരുന്നു. ഏഷ്യ കപ്പിലും സ്വർണ്ണം നേടിയ ദീപികാ കുമാരി ഈ സീസണിൽ ഉഗ്രൻ ഫോമിലാണ്. നാലാം ഒളിമ്പിക്സിനിറങ്ങുന്ന ദീപികയ്ക്കൊപ്പം അങ്കിതാ ഭഗത്, ഭജൻ കൗർ എന്നിവരാണ് വനിതാ ടീമിലുള്ളത്. ടീമിന്റെ മെന്ററും ദീപികയാണ്.
എട്ട് വർഷത്തിന് ശേഷമാണ് വനിതാ ആർച്ചറി ടീമിന് ഒളിമ്പിക്സിന് യോഗ്യത ലഭിക്കുന്നത്. ആർച്ചറിയിലെ അഞ്ച് വിഭാഗങ്ങളിലും ഇന്ത്യൻ ടീം മത്സരിക്കുന്നതും 12 വർഷങ്ങൾക്ക് ശേഷമാണ്. വനിതകളുടെ വ്യക്തിഗത റാങ്കിംഗ് റൗണ്ട് നാളെ ഉച്ചയ്ക്ക് 1 മണിക്ക് ആരംഭിക്കും. പുരുഷന്മാരുടേത് വൈകിട്ട് 5.45 -നാണ്. ഒളിമ്പിക്സ് മത്സരങ്ങൾ സ്പോർട്സ് 18 ചാനലിലും ജിയോ സിനിമയിലും കാണാം.
