ഭൂമി ഉരുണ്ടതല്ല! അതേ, ഭൂമി ഉരുണ്ടിട്ടല്ല എന്ന് പറഞ്ഞാൽ നിങ്ങൾ വിശ്വസിക്കുമോ? ഗോളാകൃതിയിലുള്ള ഗ്രഹമാണ് ഭൂമിയെന്ന് തെളിയിക്കുന്ന നിരവധി ചിത്രങ്ങൾ നമുക്ക് പക്കലുണ്ട്. ഭൂമിയെ ഉരുണ്ട ആകൃതിയിൽ പുറത്തുനിന്ന് കണ്ട ഗവേഷകർ ഇന്നും ജീവിച്ചിരിക്കുന്നുമുണ്ട്. എന്നിരുന്നാലും ഭൂമി ഉരുണ്ടതല്ല, എന്നതാണ് യാഥാർത്ഥ്യം.
ഉരുണ്ടിട്ടല്ല എന്നു പറയുമ്പോൾ ഭൂമിക്ക് പരന്ന ആകൃതിയാണ് എന്നർത്ഥമില്ല. ഏതാണ്ട് ഉരുളക്കിഴങ്ങിന്റെ ആകൃതിയാണ് ഭൂമിക്കുള്ളതെന്ന് ശാസ്ത്രജ്ഞർ പറയുന്നു. പൂർണമായും ഉരുണ്ടതല്ലാത്ത ഒരു രൂപം. ഇതിനെ ജിയോയ്ഡ് എന്നാണ് വിളിക്കുന്നത്.
ഭൂമി രൂപപ്പെട്ടതുമുതൽ സ്വയം ഭ്രമണം ചെയ്യാൻ തുടങ്ങി എന്നുള്ളതാണ് ഗോളാകൃതിക്ക് സമാനമായ രൂപം ഭൂമിക്ക് കൈവരാൻ കാരണം. അതായത്, ഭൂമദ്ധ്യരേഖയോട് ചേർന്ന് കിടക്കുന്ന ഭാഗങ്ങളിൽ വീർത്തുനിൽക്കുകയും ധ്രുവങ്ങളോട് അടുപ്പിച്ചുള്ള മേഖലകൾ പരന്നുപോവുകയും ചെയ്തത് സ്വയം ഭ്രമണം ചെയ്യുന്നതുകൊണ്ടാണ്. പറഞ്ഞുവന്നാൽ, ഭൂമിയുടെ മുകളിലും താഴെയും അൽപം പരന്നിട്ടും നടുക്ക് വീർത്തിട്ടുമാണെന്ന് പഠനങ്ങൾ സൂചിപ്പിക്കുന്നു.
ഭൂമിക്ക് എത്ര പ്രായം കാണും? ഭൂമിയിൽ കണ്ടെത്തിയ ഏറ്റവും പഴക്കം ചെന്ന ശിലകളെയും പാറകളെയുമൊക്കെ ഗവേഷണം നടത്തിയാണ് ഭൂമിയുടെ പ്രായം ശാസ്ത്രജ്ഞർ കണക്കാക്കുന്നത്. ഭൂമി രൂപപ്പെട്ടത് ഏകദേശം 460 കോടി വർഷം മുൻപാണെന്ന് ഇത്തരത്തിൽ നടത്തിയ പഠനത്തിലൂടെ ഗവേഷകർ പറയുന്നു.
