മമ്മൂട്ടിയെ നായകനാക്കി വൈശാഖ് സംവിധാനം ചെയ്ത ചിത്രമാണ് ടർബോ ജോസ്. തിയറ്ററുകളിൽ സമ്മിശ്ര പ്രതികരണങ്ങൾ ലഭിച്ച ചിത്രത്തിന്റെ അറബിക് വേർഷൻ പുറത്തിറങ്ങുകയാണ്. ഓഗസ്റ്റ് രണ്ടിനാണ് ചിത്രം ഗൾഫ് രാജ്യങ്ങളിൽ മൊഴി മാറ്റി റിലീസ് ചെയ്യുന്നത്. ടർബോ ജാസിം എന്നാണ് സിനിമയ്ക്ക് പേര് നൽകിയിരിക്കുന്നത്.
ജിസിസിയിൽ റിലീസ് ചെയ്യുന്നതിന് മുന്നോടിയായി സിനിമയുടെ അറബിക് ട്രെയിലർ അണിയറ പ്രവർത്തകർ പുറത്തുവിട്ടു. ഇതിനും സമ്മിശ്ര പ്രതികരണങ്ങളാണ് ലഭിക്കുന്നത്. ഡബ്ബിങ്ങിനെ പരിഹസിച്ചും പുകഴ്ത്തിയും ട്രെയിലറിന് താഴെ കമന്റുകൾ പ്രത്യക്ഷപ്പെടുന്നുണ്ട്.
നേരത്തെ ടർബോ ജോസ് എന്ന പേരിന് പകരം ടർബോ ജാസിം എന്ന് പേര് നൽകിയത് ട്രോളുകളിൽ നിറഞ്ഞിരുന്നു. അറബിക് വേർഷനിൽ സിനിമയിലെ എല്ലാ കഥാപാത്രങ്ങൾക്കും പ്രാദേശിക എമിറാത്തി കലാകാരന്മാരാണ് ശബ്ദം നൽകിയിരിക്കുന്നത്.
