പാരിസ്: ടേബിൾ ടെന്നീസ് വനിതാ സിംഗിൾസ് മത്സരത്തിൽ പുതുചരിത്രം കുറിച്ച് ഇന്ത്യൻ താരം മനിക ബത്ര പ്രീക്വാർട്ടറിൽ. ഇന്ത്യൻ വംശജയായ ഫ്രാൻസ് താരം പ്രീതിക പാവഡെയെ പരാജയപ്പെടുത്തിയാണ് മനിക ബത്രയുടെ മുന്നേറ്റം. 11-9, 11-6, 11-9, 11-7 എന്നിങ്ങനെ നാല് ഗെയിമും സ്വന്തമാക്കിയാണ് മനിക പ്രീക്വാർട്ടർ ഉറപ്പിച്ചത്.
ഒളിമ്പിക്സ് ടേബിൾ ടെന്നീസ് സിംഗിൾസിൽ പ്രീക്വാർട്ടറിലേക്ക് കടക്കുന്ന ആദ്യ ഇന്ത്യൻ താരമെന്ന റെക്കോർഡാണ് മനിക ഇതോടെ സ്വന്തമാക്കിയത്. 2018ലെ കോമൺവെൽത്ത് ഗെയിംസിൽ മനിക സ്വർണമെഡൽ കരസ്ഥമാക്കിയിരുന്നു. ഹോങ്കോങ് താരമായ സു ചെങ്ഷു, ജപ്പാന്റെ മിയു ഹിരാനോ എന്നിവർ തമ്മിലുള്ള മത്സരത്തിലെ വിജയിയെ പ്രീക്വാർട്ടറിൽ മനിക നേരിടും.
ലോകറാങ്കിങ്ങിൽ തന്നേക്കാൾ ഏറെ മുന്നിലുള്ള പ്രിതികയെ പരാജയപ്പെടുത്താനായത് മുന്നോട്ടുള്ള മത്സരങ്ങളിൽ മനികയ്ക്ക് ആത്മവിശ്വാസം പകരും. ലോകറാങ്കിങ്ങിൽ നിലവിൽ 28ാം സ്ഥാനത്താണ് മനിക ബത്ര, 18ാം സ്ഥാനത്തുള്ള താരമാണ് പ്രിതിക. പുതുച്ചേരി സ്വദേശികളാണ് പ്രിതികയുടെ മാതാപിതാക്കൾ. 2003ലാണ് ഇവർ ഫ്രാൻസിലേക്ക് കുടിയേറിയത്.
