കായിക ലോകത്തിന്റെ ശ്രദ്ധ മുഴുവൻ പാരിസിലേക്കാണ്. ഒളിമ്പിക്‌സിന്റെ മനോഹാരിത പങ്കുവയ്‌ക്കുന്ന നിരവധി ചിത്രങ്ങളാണ് ഇതിനോടകം സമൂഹമാദ്ധ്യമങ്ങളിൽ വൈറലായത്. വായുവിൽ പറക്കുന്ന മനുഷ്യനെ കുറിച്ച് ചിന്തിച്ച് നോക്കിയിട്ടുണ്ടോ? അത്തരത്തിലൊരു ചിത്രമാണ് ഇപ്പോൾ സോഷ്യൽ മീഡിയയിൽ വൈറലായിരിക്കുന്നത്.
ഒളിമ്പിക്‌സ് സർഫിംഗിൽ പുരുഷന്മാരുടെ ഷോർട്ട് ബോർഡ് വിഭാഗത്തിൽ ചരിത്ര സ്‌കോർ നേടിയതിന് പിന്നാലെയാണ് ബ്രസീലിയൻ താരം ഗബ്രിയേൽ മദീനയുടെ ചിത്രം വൈറലായത്.
താഹിതിയിൽ നടന്ന മത്സരത്തിൽ ജപ്പാന്റെ കനോവ ഇഗരാഷിക്കെതിരെ 9.90 സ്‌കോറാണ് മദീന നേടിയത്. ക്വാർട്ടറിന് യോഗ്യത നേടിയ താരം വായുവിലൂടെ പറക്കുന്ന തന്റെ ചിത്രവും ഇൻസ്റ്റഗ്രാമിൽ പങ്കുവച്ചിട്ടുണ്ട്. I can do everything through him strengthens Filipenses 4:13 എന്ന അടിക്കുറിപ്പോടെയാണ് ചിത്രം പങ്കുവച്ചിരിക്കുന്നത്. എഎഫ്പി ഫോട്ടോഗ്രാഫർ ജെറോം ബ്രൂയ്ലെറ്റാണ് തിരമാലയ്‌ക്ക് മുകളിൽ പൊങ്ങി നിൽക്കുന്ന മദീനയുടെ ചിത്രം ക്യാമറയിൽ ഒപ്പിയെടുത്തത്.
തിരമാലകൾ പ്രതീക്ഷിച്ചതിലും ഉയരത്തിലായിരുന്നെങ്കിലും മനോഹരമായി ആ ചിത്രം ഒപ്പിയെടുക്കാൻ സാധിച്ചെന്ന് ബ്രൂയ്‌ലെറ്റ് പറഞ്ഞു. ചിത്രത്തെ പ്രശംസിച്ചും മദീനയ്‌ക്ക് ആശംസ അറിയിച്ചും നിരവധി പേരാണ് പോസ്റ്റിന് താഴെ കമെന്റുകളുമായി എത്തിയിരിക്കുന്നത്.
