“DCയുടെ സൂപ്പർഹീറോകളെ നമുക്ക് ആവശ്യമില്ല, കാരണം നമ്മുടെ റിയൽലൈഫിൽ അവരുണ്ട്..” മേജർ സീത ഷെൽക്കെയുടെ ചിത്രം പങ്കുവച്ച് മഹീന്ദ്ര ഗ്രൂപ്പ് ചെയർമാൻ ആനന്ദ് മഹീന്ദ്ര പറഞ്ഞ വാക്കുകളാണിത്. വയനാട്ടിലെ ദുരന്തമുഖത്ത് ബെയ്ലി പാലം യാഥാർത്ഥ്യമാക്കിയ സൈനിക എൻജിനീയറായ സീത ഷെൽക്കെയെന്ന പെൺപുലി രാജ്യം മുഴുവൻ ഇപ്പോൾ ചർച്ചയാവുകയാണ്.
The WonderWoman of Wayanad.
No need for DC Super Heroes.
We have them in real life out here…
💪🏽💪🏽💪🏽 pic.twitter.com/DWslH6nKln
— anand mahindra (@anandmahindra) August 3, 2024
‘വയനാടിന്റെ വണ്ടർവുമൺ’ എന്നായിരുന്നു ആനന്ദ് മഹീന്ദ്ര അവരെ വിശേഷിപ്പിച്ചത്. DC കോമിക്സിലെ സൂപ്പർഹീറോയിനാണ് വണ്ടർവുമൺ എന്ന കഥാപാത്രം. ലോകത്തെമ്പാടുമുള്ള കോടിക്കണക്കിന് ആളുകളുടെ ആരാധന പിടിച്ചുപറ്റിയ വണ്ടർവുമൺ എന്ന കഥാപാത്രത്തെ അസാധാരണമാംവിധം കരുത്തുറ്റ വനിതകളോടാണ് പൊതുവെ താരതമ്യപ്പെടുത്താറുള്ളത്. സമാനതകളില്ലാത്ത ഉരുൾപൊട്ടൽ ദുരന്തത്തിന് വയനാട് സാക്ഷിയായപ്പോൾ മേജർ സീതാ ഷെൽക്കെ എന്ന എൻജിനീയറുടെ നേതൃപാഠവത്തിലൂടെ യാഥാർത്ഥ്യമായത് 191 അടി നീളമുള്ള ബെയ്ലി പാലമായിരുന്നു. അതും മണിക്കൂറുകൾക്കുള്ളിൽ.. അതുതന്നെയാണ് അവരെ ‘വണ്ടർവുമൺ’ എന്ന വിശേഷണത്തിന് അർഹയാക്കിയതും.
ചൂരൽമലയെയും മുണ്ടക്കൈയേയും ബന്ധിപ്പിച്ച ബെയ്ലി പാലം രക്ഷാദൗത്യത്തിൽ നിർണായക പങ്കുവഹിച്ചിരുന്നു. ദുരന്തമേഖലയിലേക്ക് ദൗത്യസംഘത്തിനും വാഹനങ്ങൾക്കും എത്തിപ്പെടാൻ വേണ്ട ആദ്യ ചുവടുവയ്പ്പായിരുന്നു പാലം പണിയുക എന്നുള്ളത്. പാലം നിർമാണ സംഘത്തെ നയിച്ചതാകട്ടെ മേജർ സീത ഷെൽക്കെയും. സൈന്യത്തിന്റെ മദ്രാസ് എൻജിനീയറിംഗ് ഗ്രൂപ്പിലെ (എം.ഇ.ജി.) വനിത.
മഹാരാഷ്ട്രയിലെ അഹമ്മദ് നഗറിൽ നിന്നുള്ള കർഷകപുത്രിയാണ് സീത. നാല് പെൺമക്കളിൽ രണ്ടാമത്തെയാൾ. 600 പേർ മാത്രമുള്ള ഗ്രാമത്തിൽ നിന്ന് 2012ൽ അവർ സൈന്യത്തിന്റെ ഭാഗമായി. അഭിമുഖ പരീക്ഷയിൽ രണ്ടുതവണ പരാജയപ്പെട്ടിരുന്നെങ്കിലും സീതയുടെ കഠിനാധ്വാനം മൂന്നാം വട്ടം വിജയം കാണുകയായിരുന്നു. ഇന്നവൾ എം.ഇ.ജിയിലെ ഏക വനിതാ എൻജിനീയറാണ്. ദുരന്തമുഖത്ത് സൈന്യത്തെ നയിക്കുന്ന കരുത്തുറ്റ പെണ്ണാണ്.
