നാടിനോടുള്ള ഇഷ്ടം കൊണ്ട് സ്വന്തം പേരിനൊപ്പം നാടിന്റെയും പേരുചേർത്ത് വച്ചൊരാൾ. ഉള്ളിൽ സ്നേഹത്തിന്റെ ആ നനവ് എപ്പോഴും കൊണ്ടുനടക്കുന്നൊരാൾ. വയനാട്ടുകാരൻ സുജിത്ത് ഉണ്ണികൃഷ്ണനെ മലയാളി അറിയുന്നത് സണ്ണി വെയ്ൻ എന്ന പേരിലാണ്. സമയം കിട്ടുമ്പോഴൊക്കെ ചുരം കയറുന്ന സണ്ണിക്ക് കേരളത്തെ നടുക്കിയ ദുരന്തം ഉൾക്കൊള്ളാനായിട്ടില്ല.
വയനാടിനെ അതേപോലെ തിരിച്ചുകിട്ടാൻ സഹായിക്കണമെന്നും ചെയ്യാവുന്നതെല്ലാം ചെയ്യണമെന്നുമാണ് സണ്ണി വെയ്ന് പറയാനുളളത്. വയനാട് സുന്ദരഭൂമിയാണ്, പക്ഷേ എപ്പോഴും ഒപ്പമുള്ള ദുരന്തങ്ങളെ തുടച്ചുനീക്കാനാകണം. പണ്ട് നടന്ന പഠനങ്ങൾ കൃത്യമായി നടപ്പാക്കിയില്ല, കെട്ടിടനിർമ്മാണം തോന്നിയപോലെയാണെന്നും ദുരന്തം ആവർത്തിക്കാതിരിക്കട്ടെയെന്നും അദ്ദേഹം പറഞ്ഞു.
”നിശബ്ദതയാണ് ചുറ്റും. ജനിച്ച മണ്ണിൽ ഇങ്ങനെയൊരു ദുരന്തം നടന്നെന്ന് പറയുന്നത് ഉൾക്കൊള്ളാനാവുന്നതിലും അപ്പുറമാണ്. വർഷങ്ങൾക്ക് മുമ്പും ഉരുൾപൊട്ടൽ ഉണ്ടായിട്ടുണ്ട്. പിന്നാലെ നിരവധി പഠനങ്ങളും ഡോക്യുമെന്റേഷനും നടന്നിട്ടുണ്ട്. അതൊക്കെ കൃത്യമായി നടപ്പാക്കാൻ ശ്രമിക്കേണ്ടതുണ്ട്. പ്രകൃതിയെ സംരക്ഷിക്കണം. ശ്രദ്ധിച്ചില്ലെങ്കിൽ ഇനിയും ദുരന്തങ്ങളെ അഭിമുഖീകരിക്കേണ്ടി വരും. ഞങ്ങളുടെ നാടിനെയും നാട്ടുകാരെയും പഴയപോലെ കൊണ്ടുവരാൻ എല്ലാവരും കൂടെ നിൽക്കണം.”- സണ്ണി വെയ്ൻ പറഞ്ഞു. ദുരന്തഭൂമിയിൽ തന്നെ കൊണ്ട് ആകുന്ന സഹായം ചെയ്തിട്ടുണ്ടെന്നും അദ്ദേഹം കൂട്ടിച്ചേർത്തു.
