ഛത്തീസ്ഗഢ് : അച്ചടക്കത്തിന്റെയോ വിദ്യാഭ്യാസത്തിന്റെയോ പേരിൽ കുട്ടികളെ ശാരീരികമായി ശിക്ഷിക്കുന്നത് ക്രൂരതയെന്ന് കോടതി. വിദ്യാർത്ഥിനിയുടെ മരണത്തിൽ ആത്മഹത്യാപ്രേരണകുറ്റം ചുമത്തപ്പെട്ട അധ്യാപികയുടെ ഹർജി തള്ളിക്കൊണ്ടായിരുന്നു കോടതിയുടെ നിരീക്ഷണം.
കുട്ടികളിൽ മാറ്റം കൊണ്ടുവരാൻ അവരെ ശാരീരിക ശിക്ഷയ്‌ക്ക് വിധേയമാക്കുന്നത് വിദ്യാഭ്യാസത്തിന്റെ ഭാഗമായി കാണാനാകില്ലെന്ന് ചീഫ് ജസ്റ്റിസ് രമേഷ് സിൻഹയും ജസ്റ്റിസ് രവീന്ദ്ര കുമാർ അഗർവാളും അടങ്ങുന്ന ഡിവിഷൻ ബെഞ്ച് പറഞ്ഞു. ജൂലൈ 29 ന് പുറപ്പെടുവിച്ച ഉത്തരവിലാണ് കോടതിയുടെ നിരീക്ഷണം.കുട്ടിയുടെ മേൽ ശാരീരിക ശിക്ഷ ചുമത്തുന്നത് ഇന്ത്യൻ ഭരണഘടനയുടെ ആർട്ടിക്കിൾ 21 ഉറപ്പുനൽകുന്ന ജീവിക്കാനുള്ള അവകാശവുമായി പൊരുത്തപ്പെടുന്നതെല്ലെന്നും കോടതി കൂട്ടിച്ചേർത്തു.
സർഗുജ ജില്ലയിലെ അംബികാപൂരിലെ കാർമൽ കോൺവെൻ്റ് സ്‌കൂളിലെ അധ്യാപികയായ എലിസബത്ത് ജോസിനെതിരെ (43) ഫെബ്രുവരിയിൽ മണിപ്പൂർ പോലീസ് സ്‌റ്റേഷനിൽ ആത്മഹത്യാ പ്രേരണകുറ്റം ആരോപിച്ച് എഫ്ഐആർ രജിസ്റ്റർ ചെയ്തിരുന്നു. വിദ്യാർത്ഥിനി എഴുതിയ ആത്മഹത്യാക്കുറിപ്പിൽ അദ്ധ്യാപികയുടെ പേര് പരാമർശിച്ചിരുന്നു.
സംഭവദിവസം എലിസബത്ത് വിദ്യാർത്ഥിനിയെ ഉപദേശിക്കുക മാത്രമാണ് ചെയ്തതെന്നും സ്‌കൂളിൽ പിന്തുടരുന്ന പതിവ് അച്ചടക്ക നടപടിയനുസരിച്ചാണ് ഐഡി കാർഡ് വാങ്ങിച്ചതെന്നും ഹർജിക്കാരിയുടെ അഭിഭാഷകൻ കോടതിയിൽ വാദിച്ചു. എന്നാൽ ആത്മഹത്യാ പ്രേരണാ കേസിലെ എഫ്ഐആറും കുറ്റപത്രവും റദ്ദാക്കണമെന്നാവശ്യപ്പെട്ട് എലിസബത്ത് നൽകിയ ഹർജി തള്ളിയ ഹൈക്കോടതി കുട്ടികൾ വിലയേറിയ ദേശീയ വിഭവം ആണെന്നും അവരെ ആർദ്രതയോടും കരുതലോടും കൂടി വേണം പരിപാലിക്കേണ്ടതെന്നും പറഞ്ഞു .
