ഇംഗ്ലണ്ട് മുൻ മധ്യനിര ബാറ്ററും പരിശീലകനുമായ ഗ്രഹാം തോർപ്പ് അന്തരിച്ചു(55). ഇംഗ്ലണ്ട് ആൻഡ് വെയിൽസ് ക്രിക്കറ്റ് ബോർഡിന്റെ (ഇസിബി) ഔദ്യോഗിക സോഷ്യൽ മീഡിയ ഹാൻഡിൽ തിങ്കളാഴ്ചയാണ് വാർത്ത പങ്കുവച്ചത്. 2022 മാർച്ചിൽ അഫ്ഗാനിസ്ഥാൻ പുരുഷ ടീമിന്റെ പരിശീലകനായി പ്രഖ്യാപിച്ചതിന് ശേഷം മുൻ ഇംഗ്ലണ്ട് താരത്തിന്റെ ആരോഗ്യനില ഗുരുതരമായിരുന്നു. ഇതോടെ ചുമതല ഏറ്റെടുക്കാനായില്ല.
” ഗ്രഹാം തോർപ്പ് അന്തരിച്ചു എന്ന വാർത്ത വളരെ ദുഃഖത്തോടെയാണ് ഞങ്ങൾ പങ്കുവെക്കുന്നത്. ഗ്രഹാമിന്റെ മരണത്തിൽ ഞങ്ങൾ അനുഭവിക്കുന്ന ആഴത്തിലുള്ള ആഘാതം വിവരിക്കാൻ ഉചിതമായ വാക്കുകളില്ല.”ഇസിബിയുടെ പ്രസ്താവനയിൽ അവർ പറഞ്ഞു. അസുഖത്തെ കുറിച്ച് വ്യക്തമാക്കിയില്ല.
1993 മുതൽ 2005 വരെ ഇംഗ്ലണ്ടിനായി 100 ടെസ്റ്റുകളിലും 82 ഏകദിനങ്ങളിലും അദ്ദേഹം കളിച്ചിട്ടുണ്ട്. ഇംഗ്ലണ്ടിന്റെ പരിശീലകനാകും മുൻപ് സ്റ്റീവൻ സ്മിത്ത്, ഡേവിഡ് വാർണർ എന്നിവരോടൊപ്പം ന്യൂ സൗത്ത് വെയിൽസിൽ കോച്ചായി പ്രവർത്തിച്ചിട്ടുണ്ട്. ഇടം കൈയൻ ബറ്ററും വലം കൈയൻ ബൗളറുമായിരുന്ന താരം 189 ഫസ്റ്റ് ക്ലാസ് മത്സരങ്ങളും കളിച്ചിരുന്നു. സറേ ക്ലബിന്റെ ഇതിഹാസ താരമായിരുന്ന അദ്ദേഹം 2005-ലാണ് വിരമിക്കൽ പ്രഖ്യാപിച്ചത്. 2013-ൽ ഇംഗ്ലണ്ടിന്റെ ബാറ്റിംഗ് പരിശീലകനായി. പാകിസ്താനെതിരെയുള്ള ടി20 പരമ്പരയിലും തോർപ്പ് താത്കാലിക പരിശീലകനായി. സീരിസ് ഇംഗ്ലണ്ട് 2-1 ന് സ്വന്തമാക്കിയിരുന്നു.
