പതിവ് തെറ്റിക്കാതെ അമ്മയുടെ പിറന്നാൾ മനോഹരമായി ആഘോഷിച്ച് നടൻ മോഹൻലാൽ. ഇടപ്പള്ളിയിലെ വീട്ടിൽ കുടുംബാംഗങ്ങൾക്കൊപ്പമായിരുന്നു അമ്മയുടെ പിറന്നാൾ ആഘോഷിച്ചത്. അമ്പലപ്പുഴയിൽ നിന്നുള്ള സംഘം അമ്മയ്ക്കായി സോപാന സംഗീതവും ആലപിച്ചിരുന്നു. സോണി ടിവിയിലെ ഹിന്ദി സംഗീത റിയാലിറ്റി ഷോ വിജയിയും മലയാളിയുമായ ആവിർഭവും മോഹൻലാലിന്റെ അമ്മയുടെ പിറന്നാളിനോടനുബന്ധിച്ച് ഇവിടെ എത്തിയിരുന്നു. അമ്മയ്ക്ക് ആസ്വദിക്കാനായി ആവിർഭവ് നിരവധി ഗാനങ്ങളും ആലപിച്ചു.
പിറന്നാൾ ആഘോഷത്തിന് ഭാര്യ സുചിത്ര, മകൻ പ്രണവ് മോഹൻലാൽ, മേജർ രവി എന്നിവരും സന്നിഹിതരായിരുന്നു. ലോകത്തിന്റെ ഏത് കോണിലാണെങ്കിലും അമ്മയുടെ പിറന്നാളിന് മോഹൻലാൽ ഓടിയെത്താറുണ്ട്. ഇത്തവണയും പതിവ് തെറ്റാതെയുള്ള ആഘോഷങ്ങളാണ് നടന്നത്. ഇതിന്റെ ചിത്രങ്ങളും വീഡിയോകളും ഇതിനോടകം സമൂഹമാദ്ധ്യമങ്ങളിൽ ശ്രദ്ധ നേടിയിട്ടുണ്ട്.
കഴിഞ്ഞ കുറച്ചു കാലമായി ആരോഗ്യപരമായ ചില കാരണങ്ങളാൽ ചികിത്സയിലാണ് അമ്മ ശാന്തകുമാരി. പാട്ടും മേളവുമായി ഇത്തവണയും അമ്മയുടെ പിറന്നാൾ ഗംഭീരമാക്കാൻ കഴിഞ്ഞതിൻെ സന്തോഷത്തിലാണ് മോഹൻലാൽ.
