മലയാള സിനിമയിലെ ഏറ്റവും വലിയ പ്രഖ്യാപനങ്ങളിൽ ഒന്നായിരുന്നു എം ടി വാസുദേവൻ നായരുടെ തിരക്കഥയിൽ മോഹൻലാലിനെ നായകനാക്കി ‘രണ്ടാമൂഴം’ വരുന്നു എന്നത്. എന്നാൽ പല കാരണങ്ങൾ കൊണ്ട് ചിത്രം സംഭവിച്ചില്ല. ഇന്നും ഭീമൻ എന്ന കഥാപാത്രം മോഹൻലാൽ ചെയ്യണമെന്ന് ആഗ്രഹിക്കുന്ന മലയാളികൾ ഏറെയാണ്. ഏറ്റവും കൂടുതൽ കാത്തിരിക്കുന്ന സിനിമകളിൽ രണ്ടാമൂഴം മുന്നിൽ തന്നെയും. ഇപ്പോഴിതാ, ചിത്രം സംഭവിക്കുമെന്ന് ഉറപ്പിച്ചു പറയുകയാണ് എം ടി വാസുദേവൻ നായരുടെ മകൾ അശ്വതി നായർ. ഒരു ഓൺലൈൻ മാധ്യമത്തിന് നൽകിയ അഭിമുഖത്തിലാണ് രണ്ടാമൂഴം വരുമെന്ന് അശ്വതി വെളിപ്പെടുത്തിയിരിക്കുന്നത്.
“രണ്ടാമൂഴം പ്രതീക്ഷിക്കാം. അച്ഛന്റെ ഉള്ളിലും അത് സിനിമയായി കാണണം എന്നുള്ള അതിയായ മോഹമുണ്ട്. അതിലേക്ക് കോൺസെൻട്രേറ്റ് ചെയ്യണം. സിനിമ ചെയ്യാനുള്ള ഒരു പ്ലാൻ ഉണ്ട്. അതിന് ആവശ്യമായ തുടക്കം കുറിച്ചു കഴിഞ്ഞു. ഒരുപാട് വൈകാതെ തന്നെ ഒരു അനൗൺസ്മെന്റിലേക്ക് പോകാൻ കഴിയുമെന്നാണ് എന്റെ പ്രതീക്ഷ. രണ്ടാമൂഴം പുസ്തകം വായിച്ചിട്ടുള്ള എല്ലാ മലയാളികളും ആഗ്രഹിക്കുന്ന സിനിമയാണ് അത്”.
“ഏറ്റവും പ്രതീക്ഷയുള്ള സിനിമകളുടെ ലിസ്റ്റ് എടുത്താൽ അതിൽ മുന്നിൽ തന്നെ രണ്ടാമൂഴം ഉണ്ട്. രണ്ടാമൂഴം പോലുള്ള ഒരു പ്രോജക്ട് ചെയ്യുന്നതിന്റെ തുടക്കമായിരിക്കാം ‘മനോരഥങ്ങൾ’ എന്നുള്ളത് ഈശ്വര നിശ്ചയമായിരിക്കും. അച്ഛന്റെ ആഗ്രഹമാണ്. അതെനിക്ക് ചെയ്തു കൊടുക്കാൻ സാധിക്കട്ടെ”-അശ്വതി പറഞ്ഞു.
