കോഴിക്കോട്: വിലങ്ങാട് ഉരുൾപൊട്ടലുണ്ടായ പ്രദേശങ്ങളിലെ സാഹചര്യം പഠിക്കാൻ ജില്ല ഭരണകൂടം നിയോഗിച്ച വിദഗ്ധ സംഘം റിപ്പോർട്ട് സമർപ്പിച്ചു. വിലങ്ങാട് പുനരധിവാസത്തിനായി നിയമിച്ച സ്പെഷ്യൽ നോഡൽ ഓഫീസർ ആർഡിഒ പി.അൻവർ സാദത്താണ് ജില്ല ഭരണകൂടത്തിന് റിപ്പോർട്ട് കൈമാറിയത്.
487 വീടുകളിൽ നടത്തിയ പരിശോധനയിൽ 313 വീടുകൾ വാസയോഗ്യമല്ലെന്ന് റിപ്പോർട്ടിൽ പറയുന്നു. ഉരുൾപൊട്ടലുണ്ടായ മഞ്ഞച്ചീളി, പാനോം, വലിയ പാനോം, ആനക്കുഴി, മാടാഞ്ചേരി, കുറ്റല്ലൂർ, പന്നിയേരി, വായാട് മേഖലകളിലാണ് സംഘം പഠനം നടത്തിയത്. നേരത്തെ ഈ മേഖലകളിലെ 100-ലേറെ സ്ഥലങ്ങളിൽ ഉരുൾപൊട്ടി ഒലിച്ചിറങ്ങിയതായി കണ്ടെത്തിയിരുന്നു. ഇതിന് പിന്നാലെയാണ് വിദഗ്ധ സംഘം പഠനം നടത്തി പുതിയ റിപ്പോർട്ട് സമർപ്പിച്ചത്.
പ്രദേശത്ത് 56 കുടുംബങ്ങൾ താമസിക്കുന്നതായി സംഘം കണ്ടെത്തിയിട്ടുണ്ട്. ഈ കുടുംബങ്ങളെ മാറ്റണമെന്നും സംഘം നിർദേശിച്ചു. 2019 ഓഗസ്റ്റിലാണ് ഉരുൾപൊട്ടലുണ്ടായത്. എന്നാൽ അഞ്ച് വർഷം കഴിഞ്ഞിട്ടും വാസയോഗ്യമല്ലാത്ത സ്ഥലത്ത് നിന്ന് കുടുംബത്തെ മാറ്റി പാർപ്പിക്കാൻ സർക്കാരിന് സാധിച്ചിട്ടില്ല.
