ആത്മീയ ടൂറിസത്തിന് ഉത്തേജനം; രാജ്യത്തിന് മൂന്ന് വന്ദേ ഭാരത് എക്സ്പ്രസുകൾ കൂടി; പ്രധാനമന്ത്രി ഇന്ന് ഫ്ലാ​ഗ് ഓഫ് ചെയ്യും; റൂട്ടുകളറിയാം

ന്യൂഡൽഹി: രാജ്യത്തിന് മൂന്ന് വന്ദേ ഭാരത് എക്സ്പ്രസ് ട്രെയിനുകൾ കൂടി. പ്രധാനമന്ത്രി നരേന്ദ്ര മോദി ഇന്ന് ഫ്ലാ​ഗ് ഓഫ് ചെയ്യും. വീഡിയോ കോൺഫറൻസിലൂടെയാകും ഫ്ലാ​ഗ് ഓഫ്. ഉത്തർപ്രദേശ്, തമിഴ്നാട്, കർണാടക എന്നീ സംസ്ഥാനങ്ങളിലെ ​ഗതാ​ഗതത്തെ സു​ഗമമാക്കുന്നതിൽ പുതിയ വന്ദേ ഭാരത് ട്രെയിനുകൾ നിർണായക പങ്ക് വഹിക്കും.

ചെന്നൈ സെൻട്രൽ- നാഗർകോവിലിൽ, മധുര-ബെംഗളൂരു കൻ്റോൺമെൻ്റ്, മീററ്റ് സിറ്റി-ലക്നൗ എന്നിവിടങ്ങളിലേക്കാണ് പുതിയ വന്ദേ ഭാരത് ട്രെയിനുകൾ സർവീസ് നടത്തുക.

നാഗർകോവിലിലേക്കുള്ള ട്രെയിൻ ചെന്നൈ സെൻട്രലിൽ നിന്ന് ഫ്ലാഗ് ഓഫ് ചെയ്യുമെങ്കിലും ചെന്നൈ എഗ്മോറിൽ നിന്നാകും സർവീസ് (ട്രെയിൻ നമ്പർ- 20627) നടത്തുക. ബുധനാഴ്ച ഒഴികെ എല്ലാ ദിവസവും സർവീസുണ്ടാകും. ചെന്നൈ എഗ്മോറിൽ നിന്ന് രാവിലെ അഞ്ച് മണിക്ക് പുറപ്പെട്ട് ഉച്ചയ്‌ക്ക് 1.50-ന് നാഗർകോവിലിലെത്തും, താംബരം, വില്ലുപുരം, തിരുച്ചിറപ്പള്ളി, ദിണ്ടുഗൽ, മധുരൈ, കോവിൽപട്ടി, തിരുനെൽവേലി എന്നിവിടങ്ങളിൽ സ്റ്റോപ്പുണ്ട്. മടക്ക ട്രെയിൻ (നമ്പർ 20628) നാഗർകോവിലിൽ നിന്ന് ഉച്ചയ്‌ക്ക് 2.20-ന് പുറപ്പെട്ട് രാത്രി 11-ന് ചെന്നൈയിലെത്തും. മീനാക്ഷി അമ്മൻ ക്ഷേത്രം, മധുര, കുമാരി അമ്മൻ ക്ഷേത്രം, കന്യാകുമാരി എന്നിവിടങ്ങളിലേക്ക് എത്തുന്ന തീർത്ഥാടകർക്കും സഞ്ചാരികൾക്കും ​പ്രയോജനപ്രദമാകും.

മധുര-ബെം​ഗളൂരു വന്ദേ ഭാരത് ട്രെയിൻ (20671) ചൊവ്വാഴ്ച ഒഴികെ മറ്റെല്ലാ ദിവസവും സർവീസ് നടത്തും. രാവിലെ 5.15-ന് പുറപ്പെട്ട് ഉച്ചയ്‌ക്ക് ഒരു മണിക്ക് ബെംഗളൂരുവിലെത്തും. ദിണ്ടുഗൽ, തിരുച്ചിറപ്പള്ളി, കരൂർ, നാമക്കൽ, സേലം, കൃഷ്ണരാജപുരം എന്നിവിടങ്ങളിൽ സ്റ്റോപ്പുണ്ടാകും. തിരിച്ചു (ട്രെയിൻ നമ്പർ- 20672) ബെംഗളൂരുവിൽ നിന്ന് 1: 30-ന് പുറപ്പെട്ട് രാത്രി 9:45-ന് മധുരയിൽ എത്തിച്ചേരും.

മീററ്റ് സിറ്റി-ലക്‌നൗ വന്ദേ ഭാരത് (22490) ചൊവ്വാഴ്ച ഒഴികെയുള്ള ദിവസങ്ങളിൽ സർവീസ് നടത്തും. മീററ്റ് സിറ്റിയിൽ നിന്ന് രാവിലെ 6.35-ന് പുറപ്പെട്ട് ലക്നൗവിലെ ചാർബാഗ് റെയിൽവേ സ്റ്റേഷനിൽ ഉച്ചയ്‌ക്ക് 1.45-ന് എത്തിച്ചേരും. മൊറാദാബാദിലും ബറേലിയിലും സ്റ്റോപ്പുകൾ ഉണ്ടാകും. മടക്കയാത്ര (22489) ചാർബാഗ് റെയിൽവേ സ്റ്റേഷനിൽ നിന്ന് ഉച്ചയ്‌ക്ക് 2.45-ന്. രാത്രി പത്തിന് മീററ്റ് സിറ്റിയിൽ എത്തിച്ചേരും. ദിഗംബർ ജൈന ക്ഷേത്രം, മാനസ ദേവി മന്ദിർ, സൂരജ്കുണ്ഡ് ക്ഷേത്രം, ഔഘർനാഥ് ക്ഷേത്രം തുടങ്ങിയ തീർത്ഥാടന കേന്ദ്രങ്ങളിലേക്ക് അതിവേഗത്തിൽ എത്തിച്ചേരാൻ ഈ സർവീസ് സഹായിക്കും. രാജ്യത്തെ ആത്മീയ ടൂറിസത്തിന് ഉത്തേജനം നൽകുന്നതാണ് പുതിയ വന്ദേ ഭാരത് സർവീസുകൾ.