തിരുവനന്തപുരം: സ്തനാർബുദത്തെ അതിജീവിച്ച 58 കാരിയുടെ വയറ്റിൽ കണ്ടെത്തിയ മുഴ മുറിവുകളില്ലാതെ സുരക്ഷിതമായി നീക്കം ചെയ്ത് ഡോക്ടർമാർ. തിരുവനന്തപുരം കിംസ്ഹെൽത്തിൽ നടത്തിയ നൂതന എൻഡോസ്‌കോപ്പിക് സബ് മ്യൂക്കോസൽ ഡിസെക്ഷൻ (ഇഎസ്ഡി) പ്രൊസീജിയറിലൂടെയാണ് വയറിനുള്ളിൽ നിന്ന് മുറിവുകളില്ലാതെ മുഴ നീക്കം ചെയ്തത്.
സ്തനാർബുദ ചികിത്സയുടെ ഭാഗമായി നടത്തിയ പെറ്റ് സിടി സ്‌കാനിൽ വയറിന്റെ ഭിത്തിയിൽ ഏകദേശം 2 സെന്റീമീറ്റർ നീളവും 1.5 സെന്റീമീറ്റർ വീതിയുമുള്ള മുഴയാണ് കണ്ടെത്തിയത്. ആദ്യത്തെ ബയോപ്സി റിപ്പോർട്ടുകൾ അർബുദ സാധ്യത തള്ളിക്കളഞ്ഞെങ്കിലും, തുടർന്നുള്ള സ്‌കാനിൽ ഈ മുഴ വലുതാകുന്നത് ശ്രദ്ധയിൽപ്പെട്ടു. തുടർന്ന് ഭാവിയിൽ അർബുദമായി മാറാനുള്ള സാധ്യത കണക്കിലെടുത്താണ് രോഗിയെ അടിയന്തര ശസ്ത്രക്രിയയ്‌ക്ക് വിധേയമാക്കിയത്.
നേരത്തെ സ്തനാർബുദത്തിന് ശസ്ത്രക്രിയയ്‌ക്കും കീമോതെറാപ്പിക്കും ഇവർ വിധേയായിരുന്നു. ഈ പശ്ചാത്തലം കൂടി പരിഗണിച്ചാണ് ഡോക്ടർമാർ അടിയന്തരമായി മുഴ നീക്കം ചെയ്യാൻ തീരുമാനിച്ചത്. ഗാസ്‌ട്രോ എന്ററോളജി വിഭാഗം സീനിയർ കൺസൾട്ടന്റ് ഡോ. മധു ശശിധരന്റെ നേതൃത്വത്തിലാണ് ശസ്ത്രക്രിയ നടന്നത്. ‘ഹൈബ്രിഡ് നൈഫ് എന്ന അതിനൂതന ഉപകരണം വച്ച് മുഴ വയറിന്റെ ഭിത്തിയിൽ നിന്ന് വേർപെടുത്തി എൻഡോസ്‌കോപ്പ് വഴി പൂർണമായും നീക്കം ചെയ്യുകയും രക്തസ്രാവം തടയാനായി പ്രോസീജർ ചെയ്ത ഭാഗം വീണ്ടും പരിശോധിച്ചു ഉറപ്പ് വരുത്തുകയും ചെയ്തതായി ഡോക്ടർ പറഞ്ഞു.
ശസ്ത്രക്രിയയ്‌ക്ക് ശേഷമുള്ള മൂന്ന് ദിവസങ്ങളിൽ രോഗിക്ക് വെള്ളമോ ഭക്ഷണമോ നൽകിയിരുന്നില്ല. പോസ്റ്റ്-ബേറിയം മീൽ പരിശോധനയിൽ പ്രൊസീജിയർ ചെയ്ത ഭാഗത്ത് നിന്ന് യാതൊരു ലീക്കേജും ഇല്ലെന്ന് ഉറപ്പാക്കിയ ശേഷമാണ് ആഹാരം നൽകിയത്. തൊട്ടടുത്ത ദിവസം തന്നെ ആശുപത്രി വിടുകയും ചെയ്തു.
ഗാസ്‌ട്രോ എന്ററോളജി വിഭാഗം സീനിയർ കൺസൾട്ടന്റുമാരായ ഡോ. അജിത്ത് കെ നായർ, ഡോ. ഹാരിഷ് കരീം, അസോസിയേറ്റ് കൺസൾട്ടന്റ് ഡോ. അരുൺ പി, അനസ്‌തേഷ്യ വിഭാഗത്തിലെ ഡോ. ശർമില എന്നിവരും പ്രൊസീജിയറിന്റെ ഭാഗമായിരുന്നുവെന്ന് ആശുപത്രി അധികൃതർ അറിയിച്ചു.
