പോഷക സമ്പന്നമാണ് നട്സ്. നല്ല ആരോഗ്യത്തിനായി ഓരോ ദിവസവും ഒരുപിടി നട്സ് ഭക്ഷണക്രമത്തിൽ ഉൾപ്പെടുത്തണമെന്നാണ് ആരോഗ്യ വിദഗ്ധർ പറയുന്നത്. മിക്കയവരുടെയും പ്രിയപ്പെട്ട നട്സാണ് ബദാം. ഭൂരിഭാഗം പേരും രാത്രിയിൽ കുതിർത്ത് വച്ച് രാവിലെ വെറും വയറ്റിൽ കഴിക്കുന്നു. നാരുകൾ, പ്രോട്ടീൻ, ആൻ്റി ഓക്സിഡൻ്റുകൾ, വിറ്റാമിൻ ഇ, ആരോഗ്യകരമായ കൊഴുപ്പ് തുടങ്ങിയവയാൽ സമ്പന്നമാണ് ബദാം. എന്നാൽ ബദാം കുതിർത്ത വച്ച വെള്ളം കുടിക്കാതെ ബദാം മാത്രം കഴിക്കുന്നവരാണോ നിങ്ങൾ. ബദാമിനൊപ്പം തന്നെ നിറയെ ഗുണങ്ങളാണ് ബദാം കുതിർത്ത വെള്ളത്തിനുമുള്ളത്.
ബദാം കുതിർത്ത വെള്ളത്തിന്റെ ഗുണങ്ങളറിയാം..
നന്നായി ഉറങ്ങിയാലും ഭയങ്കര ക്ഷീണം അനുഭവപ്പെടുന്നവർക്ക് മികച്ച ഓപ്ഷനാണ് ബദാം കുതിർത്ത വെള്ളം. പ്രോട്ടീൻ, ആരോഗ്യകരമായ കൊഴുപ്പ്, വിറ്റാമിനുകൾ എന്നിവയാൽ സമ്പന്നമാണ് ഈ വെള്ളം. ദിവസം മുഴുവൻ ഊർജ്ജസ്വമായിരിക്കാൻ ബദാമിനൊപ്പം വെള്ളവും കുടിക്കാം.
പ്രാതലിന് മുൻപായി ഈ വെള്ളം കുടിക്കുന്നത് ശരീരഭാരം നിയന്ത്രിക്കാൻ സഹായിക്കും. നാരുകളാൽ സമ്പന്നമാണ് ബദാം. വിശപ്പിനെ ശമിപ്പിക്കാനും വയർ നിറഞ്ഞത് പോലെ തോന്നിപ്പിക്കാനും ഇതിന് കഴിയും.
മോശം കൊളസ്ട്രോൾ അഥവാ എൽഡിഎൽ കൊളസ്ട്രോൾ കുറച്ച് നല്ല എച്ച്ഡിഎൽ കൊളസ്ട്രോൾ വർദ്ധിപ്പിക്കുന്നു. അതുവഴി ഹൃദയാരോഗ്യത്തിന് ഗുണം ചെയ്യുന്നു. വെറും വയറ്റിലാണ് ബദാമും വെള്ളവും കഴിക്കേണ്ടത്.
ചർമത്തിന്റെ ആരോഗ്യത്തിനും ബദാം വെള്ളം സഹായിക്കുന്നു. ആൻ്റി ഓക്സിഡൻ്റുകളും വിറ്റാമിൻ ഇ-യും ധാരാളം അടങ്ങിയിട്ടുണ്ട്. ചർമത്തിന് തിളക്കം നൽകാനും ഇത് സഹായിക്കുന്നു. മുടിയുടെ ഘടന മെച്ചപ്പെടുത്തുന്നതിനും ചർമ്മത്തെ മൃദുവാക്കുകയും ചെയ്യുന്നു.
ചെറു ചൂടുവെള്ളം ഒഴിച്ച് വേണം ബദാം കുതിർക്കാൻ. 8-12 മണിക്കൂർ നേരം കുതിർത്തതിന് ശേഷം കഴിക്കാവുന്നതാണ്. തൊലി കളഞ്ഞും കളയാതെയും കഴിക്കാം. ഒപ്പം വെള്ളവും കുടിക്കാം.
