നടി ശ്രീവിദ്യ മുല്ലച്ചേരി വിവാഹിതയായി. സംവിധായകൻ രാഹുൽ രാമചന്ദ്രനാണ് വരൻ. അടുത്ത ബന്ധുക്കളും സുഹൃത്തുക്കളും മാത്രമായിരുന്നു വിവാഹത്തിൽ പങ്കെടുത്തത്. കേന്ദ്രമന്ത്രി സുരേഷ് ഗോപിയും ഇരുവരുടെയും വിവാഹത്തിൽ പങ്കെടുത്തിരുന്നു. ഇരുവരുടേയും പ്രണയ വിവാഹമാണ്. കഴിഞ്ഞ വർഷം ജനുവരിയിലായിരുന്നു താരങ്ങളുടെ വിവാഹ നിശ്ചയം കഴിഞ്ഞത്.
വിവാഹം വളരെ ഭംഗിയായി നടന്നതിൽ സന്തോഷമുണ്ടെന്നും പുതിയ ജീവിതത്തിലേക്ക് കാലെടുത്ത് വയ്‌ക്കുകയാണെന്നും ശ്രീവിദ്യ പറഞ്ഞു. എല്ലാം മംഗളമായി നടന്നതിൽ ഈശ്വരന് നന്ദി പറയുന്നുവെന്നും അവർ വ്യക്തമാക്കി. തന്റെ ക്ഷണപ്രകാരം സുരേഷ് ഗോപി വിവാഹത്തിൽ പങ്കെടുത്തതിന്റെ സന്തോഷവും താരം പങ്കുവച്ചു.
കോമഡി ഷോകളിലൂടെയും, റിയാലിറ്റി ഷോകളിലൂടെയും പ്രേക്ഷകരുടെ ഹൃദയം കവർന്ന നടിയാണ് ശ്രീവിദ്യ. ഒരു കുട്ടനാടൻ ബ്ലോഗ്, നൈറ്റ് ഡ്രൈവ്, ഒരു പഴയ ബോംബ് കഥ തുടങ്ങി ഏതാനും സിനിമകളിലും ശ്രീവിദ്യ അഭിനയിച്ചിട്ടുണ്ട്. 2019-ൽ പുറത്തിറങ്ങിയ ജീംബൂബയാണ് രാഹുലിന്റെ സംവിധാനത്തിൽ എത്തിയ ആദ്യ ചിത്രം.
