ശരീരഭാരം നിയന്ത്രിക്കാൻ വഴികൾ തേടി അലഞ്ഞവരാകും മിക്കവരും. ജിമ്മിൽ പോയി, ഡയറ്റൊക്കെ നോക്കി കഷ്ടപ്പെടുന്നവർക്ക് ചില പച്ചക്കറികൾ കൂടി പരീക്ഷിക്കാം. പച്ചക്കറികളിലും പഴങ്ങളിലും ധാരാളം നാരുകൾ, ധാതുക്കൾ, വിറ്റാമിനുകൾ തുടങ്ങിയവ അടങ്ങിയിട്ടുണ്ട്. ഇത് ശരീരത്തിലെ മെറ്റബോളിസം മെച്ചപ്പെടുത്താനും വയറിലെ കൊഴുപ്പ് എരിച്ച് കളയാനും സഹായിക്കും. കൊഴുപ്പിനെ ഇല്ലാതാക്കുന്ന ചില പച്ചക്കറികൾ അറിയാം.
ചീരയും മറ്റ് ഇലക്കറികളും കൊഴുപ്പിനെ ഇല്ലാതാക്കാൻ സഹായിക്കുമെന്ന് പഠനങ്ങളിൽ തെളിഞ്ഞിട്ടുണ്ട്. പ്രഭാത ഭക്ഷണത്തിലോ ഉച്ചഭക്ഷണത്തിലോ ഇലക്കറികൾ ഉൾപ്പെടുത്താൻ ശ്രദ്ധിക്കുക. കൊഴുപ്പ് കുറയ്ക്കുന്നതിന് പുറമേ കണ്ണുകളുടെ ആരോഗ്യത്തിനും ഇലക്കറികൾ നല്ലതാണ്.
രക്തത്തിലെ ഗ്ലൂക്കോസിന്റെ അളവിനെ നിയന്ത്രിക്കാനും ശരീരഭാരം കുറയ്ക്കാനും കൂൺ സഹായിക്കുന്നു. പ്രോട്ടീൻ സമ്പന്നമാണ് കൂൺ. എല്ലുകളുടെയും പല്ലുകളുടെയും ആരോഗ്യത്തിനും ഇത് നല്ലതാണ്. മെറ്റബോളിസം വർദ്ധിപ്പിക്കാനും കൂൺ കഴിക്കുന്നത് നല്ലതാണ്.
കോളിഫ്ലവർ, ബ്രോക്കോളി എന്നിവയും ഭക്ഷണത്തിൽ ഉൾപ്പെടുത്തുന്നത് നല്ലതാണ്. ധാതുക്കൾക്കും വിറ്റാമിനുകൾക്കും പുറമേ കൊഴുപ്പ് കുറയ്ക്കാൻ സഹായിക്കുന്ന ഫൈറ്റോകെമിക്കലുകൾ ഇവയിൽ അടങ്ങിയിട്ടുണ്ട്. ഫോളേറ്റ്, വിറ്റാമിൻ സി സമ്പന്നമാണ് ഇവ രണ്ടും.
മുളകും ശരീരഭാരം കുറയ്ക്കാൻ സഹായിക്കും. മുളക് കഴിക്കുന്നതിലൂടെ ഉണ്ടാകുന്ന ചൂട് കൂടുതൽ കലോറി ഉപയോഗിക്കാനും ശരീരത്തിലെ കൊഴുപ്പിന്റെ പാളികൾ ഓക്സിഡൈസ് ചെയ്യാനും സഹായിക്കുമെന്ന് സമീപകാല പഠനങ്ങൾ തെളിയിച്ചിട്ടുണ്ട്.
കുറഞ്ഞ കലോറിയും കൂടുതൽ നാരുകളും അടങ്ങിയിട്ടുള്ള മത്തങ്ങയും ശീലമാക്കാം. സാലഡുകളിൽ ചേർത്തോ സ്മൂത്തിയായോ ജ്യൂസായോ കഴിക്കാവുന്നതാണ്.
കലോറി കുറഞ്ഞ പച്ചക്കറിയാണ് കാരറ്റ്. ലയിക്കുന്നതും ലയിക്കാത്തതുമായ നാരുകളാൽ സമ്പുഷ്ടമാണ് ഇത്. ജ്യൂസായോ മറ്റ് പഴങ്ങൾക്കൊപ്പെ ചേർത്തോ കഴിക്കാവുന്നതാണ്.
ശതാവരി കിഴങ്ങും ശരീരഭാരത്തെ പിടിച്ചുകെട്ടും. ഇതിൽ അടങ്ങിയിരിക്കുന്ന രാസവസ്തു കോശങ്ങളിൽ നേരിട്ട് പ്രവർത്തിച്ച് കൊഴുപ്പിനെ വിഘടിപ്പിക്കുന്നു.
വെള്ളവും നാരുകളും അടങ്ങിയിട്ടുള്ള വെള്ളരിക്കയും ശരീരഭാരത്തെ നിയന്ത്രിക്കുന്നു. വിശപ്പിനെ ശമിപ്പിക്കാൻ ഇത് നല്ലതാണ്. ജ്യൂസായോ അല്ലാതെയോ കുക്കുമ്പർ കഴിക്കാം.
