പോഷകങ്ങൾക്ക് പുറമേ ശരീരത്തിന് ലവണങ്ങളും പ്രധാനമാണ്. അത്തരത്തിൽ അനിവാര്യമായ ധാതുവാണ് മഗ്നീഷ്യം. കോശങ്ങളുടെ ശരിയായ പ്രവർത്തനത്തിനും ഹൃദയാരോഗ്യത്തിനും പ്രതിരോധശേഷിക്കും പേശികളുടെ ബലത്തിനും മഗ്നീഷ്യം പ്രധാനമാണ്. സ്ത്രീകളാണെങ്കിൽ പ്രതിദിനം 320 മുതൽ 360 മില്ലിഗ്രാം വരെയും പുരുഷന്മാർക്ക് 410 മുതൽ 420 മില്ലിഗ്രാം വരെ മഗ്നീഷ്യവും ശരീരത്തിനാവശ്യമാണ്.
വെള്ളമാണ് സുഗമമായി മഗ്നീഷ്യം ലഭിക്കുന്ന ഉറവിടം. ഇലക്കറികൾ, നട്സ്, വിത്തുകൾ, ധാന്യങ്ങൾ തുടങ്ങിയവ കഴിക്കുന്നതിലൂടെയും മഗ്നീഷ്യം ശരീരത്തിലെത്തും. ദീർഘകാലമായി മഗ്നീഷ്യം ശരീരത്തിലെത്തിയില്ലെങ്കിൽ വളരെ ഗുരുതരമായ പ്രശ്നങ്ങൾ സൃഷ്ടിക്കുമെന്നാണ് പുതിയ പഠനം പറയുന്നത്. പ്രധാനമായും വെല്ലുവിളി സൃഷ്ടിക്കുന്നത് പ്യൂരിഫൈഡ് അഥവ ഫിൽട്ടർ ചെയ്ത വെള്ളമാണ്.
ഇസ്രയേലിലെ ടബ് സെൻ്റർ റിസർച്ച് ആൻഡ് പോളിസി ഇനിഷ്യേറ്റീവ് ഫോർ എൻവയോൺമെൻ്റ് ആൻഡ് ഹെൽത്തിലെ ഗവേഷകർ നടത്തിയ പഠനത്തിൽ ഉപ്പ് നീക്കം ചെയ്ത വെള്ളത്തിൽ മഗ്നീഷ്യം കുറവാണെന്നും ഇത് ടൈപ്പ് 2 പ്രമേഹം, പക്ഷാഘാതം, ഹൃദ്രോഗം എന്നിവയുടെ സാധ്യത വർദ്ധിപ്പിക്കുമെന്ന് കണ്ടെത്തി. കുടിവെള്ളത്തിലെ മഗ്നീഷ്യത്തിന്റെ അഭാവമാണ് ഇതിന് പ്രധാന കാരണമായി പഠനത്തിൽ പറയുന്നത്. നേരത്തെ കുടിവെള്ളത്തിലൂടെ പ്രതിദിനം 50 മില്ലിഗ്രാം മഗ്നീഷ്യം ശരീരത്തിലെത്തിയിരുന്നു.
സമുദ്രജലത്തിൽ നിന്ന് ഉപ്പും മറ്റ് മാലിന്യങ്ങളും നീക്കം ചെയ്ത് ശുദ്ധികരിക്കുന്ന പ്രക്രിയയാണ് ഡിസലൈനേഷൻ. ഈ പ്രക്രിയ നടക്കുന്ന സമയത്ത് ധാതുക്കളും ലവണങ്ങളും നീക്കം ചെയ്യപ്പെടുന്നു. 2006-ലെ പഠനമനുസരിച്ച് മുതിർന്നൊരാൾക്ക് ആവശ്യമായ മഗ്നീഷ്യത്തിന്റെ 2.5 ശതമാനത്തോളം നൽകാൻ രണ്ട് ലിറ്റർ കുടിവെള്ളത്തിനാകും.
