കൂട്ടമായി ജീവിക്കുന്ന കടന്നൽ, തേനീച്ച പോലുള്ള ഷഡ്പദങ്ങൾ തങ്ങളുടെ വാസസ്ഥലത്തെ സംരക്ഷിക്കാനായി മാത്രം ശത്രുക്കളം ആക്രമിക്കുന്നവരാണ്. തീക്ഷ്ണമായ ഗന്ധം, വർണം, ശബ്ദം തുടങ്ങിയവയൊക്കെ ഇവയെ ഭയപ്പെടുത്തുകയും അക്രമസാക്തരാക്കുകയും ചെയ്യുന്നു. കൊമ്പ് പോലുള്ള അവയവം വച്ചാണ് ഇവ ശത്രുക്കളെ ആക്രമിക്കുന്നത്. കുത്തുന്നതോടെ തേനീച്ച മരണമടയുന്നു. എന്നാൽ കടന്നലുകൾ അങ്ങനെയല്ല.
കടന്നൽ കുത്തേറ്റാൽ മരിക്കുമോയെന്ന സം‌ശയം പലർക്കുമുണ്ട്. പലതരം എൻസൈമുകളുടെയും അമൈനുകളുടെയും ടോക്സിക്കായ പെപ്റ്റൈഡുകളുടെയും മിശ്രിതമാണ് ഇവയുടെ വിഷം. കടന്നൽ കുത്തുകൾക്ക് ഒരാളെ കൊല്ലാനുള്ള കെൽപ്പുണ്ട്. കുത്തുകളുടെ എണ്ണം അനുസരിച്ചിരിക്കും ഓരോരുത്തരുടെയും ശരീരത്തിൽ ഈ വിഷം പ്രവർത്തിക്കുന്നത്. ഗുരുതരമായ അലർജി പ്രശ്നമുള്ളവരെ കടന്നൽ കുത്തിയാൽ ആരോഗ്യസ്ഥിതി വഷളാകാൻ സാധ്യതയുണ്ട്. എന്നാൽ ഇവയെ അകറ്റി നിർത്തിയാൽ ഈ പ്രശ്നങ്ങളിൽ നിന്ന് മോചനം നേടാം. അതിനായി വീട്ടുമുറ്റത്തോ പൂന്തോട്ടത്തിലോ ഈ സസ്യങ്ങൾ നട്ടുപിടിപ്പിച്ചാൽ മതി.
- തുളസി, പുതിന ചെടികൾ നട്ടുവളർത്തുന്നത് നല്ലതാണ്. ഇവയുടെ മണമാണ് കടന്നലുകളെ അകറ്റുന്നത്. ഇവയിൽ നിന്ന് തയ്യാറാക്കുന്ന എണ്ണകൾ ഉപയോഗിക്കുന്നതും നല്ലതാണ്.
- കാശിത്തുമ്പ വളർത്തുന്നതും നല്ലതാണ്. പൂന്തോട്ടത്തിന് അലങ്കാരമായാണ് പലരും ഇത് വളർത്തുന്നെതങ്കിലും കടന്നലുകൾക്ക് ഇവയെ ഭയമാണ്. ഏകദേശം 300-ലധികം ഇനം കാശിത്തുമ്പയുണ്ടെന്നാണ് കണക്ക്.
- ജമന്തിയുടെ മണവും കീടങ്ങളെയും പ്രാണികളെയും അകറ്റുന്നു. കുറച്ച് ശ്രദ്ധ മാത്രം നൽകിയാൽ വേണ്ടുവോളം പുഷ്പിക്കുന്ന പൂച്ചെടിയാണ് ജമന്തി.
- യൂക്കാലിപ്റ്റസ് മരങ്ങൾ വളർത്തുന്നതും നല്ലതാണ്. ഇവയുടെ ശിഖരങ്ങൾ ഇടയ്‌ക്കിടയ്‌ക്ക് മുറിച്ചുവിടുന്നത് കീടങ്ങളെയും പ്രാണികളെയും അകറ്റാൻ സഹായിക്കും. കാഞ്ഞിരവും ഇതേ ഫലം നൽകുന്നു.
- ഇഞ്ചിപ്പുല്ലിന്റെ മണവും ഇവയെ അകറ്റുന്നു. പൂന്തോട്ടത്തിലും വീടിന്റെ പരിസരത്തും പുൽത്തൈലം തളിക്കുന്നതും നല്ലതാണ്.
