ടെൽഅവീവ്: കഴിഞ്ഞ ദിവസമാണ് ഇസ്രായേലിന് നേരെ ഇറാൻ കടുത്ത മിസൈൽ ആക്രമണം നടത്തിയത്. ഇരുന്നൂറോളം മിസൈലുകളാണ് ഇസ്രായേലിനെ ലക്ഷ്യമിട്ട് ഇറാൻ തൊടുത്തത്. സംഭവസമയത്ത് ഇതുവഴി പോവുകയായിരുന്ന ബ്രിട്ടീഷ് എയർവെയ്സിന്റെ ഒരു വിമാനത്തിൽ നിന്ന് ചിത്രീകരിച്ച ദൃശ്യങ്ങളാണ് ഇപ്പോൾ സമൂഹമാദ്ധ്യമങ്ങളിൽ വൈറലാകുന്നത്.
കാഴ്ചക്കാരിൽ അങ്ങേയറ്റം ഭീതി ജനിപ്പിക്കുന്ന വീഡിയോ ആണിത്. ആകാശത്ത് കൂടി മിസൈലുകൾ പോകുന്നതായി ദൃശ്യങ്ങളിൽ കാണാം. ആക്രമണം നടത്തുന്നതിന് മുൻപായി ഇറാൻ എയർവേകൾ പരിശോധിച്ചില്ലെന്ന് കൂടി സ്ഥിരീകരിക്കുന്ന വീഡിയോ ആണിത്. സംഭവത്തിൽ ഇറാനെതിരെ വിമർശനം ശക്തമായിട്ടുണ്ട്.
ദുബായിലേക്ക് പോവുകയായിരുന്ന ബ്രിട്ടീഷ് എയർവെയ്സ് വിമാനത്തിലെ പൈലറ്റാണ് ഈ വീഡിയോ ചിത്രീകരിച്ചത്. സംഭവത്തിന് പിന്നാലെ വിമാനം സുരക്ഷിതമായി വഴിതിരിച്ച് വിടുകയായിരുന്നു. മുന്നറിയിപ്പില്ലാതെ ഇറാൻ നടത്തിയ ആക്രമണത്തിന് പിന്നാലെ എല്ലാ വിമാനക്കമ്പനികളും ഇതുവഴിയുള്ള വിമാനങ്ങൾ വഴിതിരിച്ച് വിടുകയായിരുന്നു.
Filmed from flight deck of an airliner near Shiraz, Iran. No warning from ATC who had no idea. Turned away immediately. pic.twitter.com/Iq6k6jY9Zm
— Tim L-G🇺🇦 (@IntercityFC) October 1, 2024
ബ്രിട്ടീഷ് എയർവെയ്സിന് പുറമെ എമിറേറ്റ്സ്, ലുഫ്താൻസ, ഖത്തർ എയർവെയ്സ് തുടങ്ങിയവയുടെ 80ഓളം വിമാനങ്ങളാണ് കെയ്റോയിലേക്കും മറ്റ് യൂറോപ്യൻ നഗരങ്ങളിലേക്കുമായി വഴിതിരിച്ച് വിട്ടത്. ദുബായ്, ദോഹ, അബുദാബി തുടങ്ങിയ സ്ഥലങ്ങളിലേക്ക് വരികയായിരുന്ന വിമാനങ്ങളാണ് ഇവയിൽ ഭൂരിഭാഗവും. ആക്രമണവിവരം പുറത്ത് വന്നതിന് പിന്നാലെ ഇസ്രായേൽ, ലെബനൻ, ജോർദാൻ, ഇറാഖ്, സിറിയ എന്നിവിടങ്ങളിൽ നിന്നുള്ള വിമാനസർവീസുകൾ പൂർണമായും നിർത്തിവച്ചു. ഇതിൽ ഇറാഖും ജോർദാനും പിന്നീട് വിമാനസർവീസുകൾ പുന:രാരംഭിക്കുകയായിരുന്നു.
