മറന്നു വച്ച എയർപോഡ് കൊടുത്തുവിട്ടത് ചോറ്റുപാത്രത്തിലാക്കി, അമ്മയുടെ കരുതലിനുമുന്നിൽ തോൽവി സമ്മതിച്ച് മകളുടെ പോസ്റ്റ്

അമ്മമാർ എപ്പോഴും അമ്മമാരായിതന്നെ പെരുമാറുമെന്ന പതിവ് ധാരണയെ ശരിവയ്‌ക്കുന്ന രസകരമായൊരു പോസ്റ്റാണ് ബാഹർ ബത്ര എന്ന യുവതി സമൂഹ മാധ്യമത്തിൽ പങ്കുവച്ചത്. ഓഫിസിലെത്തിയപ്പോഴാണ് തന്റെ എയർപോഡ് വീട്ടിൽ മറന്നുവെച്ച കാര്യം ബാഹറിന് ഓർമ വന്നത്. ഉടൻ തന്നെ മറ്റുവഴികളില്ലാതെ അമ്മയെ വിളിച്ച് കാര്യം പറഞ്ഞു. ഡെലിവറി ഏജൻറ് മുഖേന എയർ പോഡ് കൊടുത്തുവിടാനും ആവശ്യപ്പെട്ടു.

അമ്മ തന്റെ ദൗത്യം100 ശതമാനം ആത്മാർത്ഥതയോടെ പൂർത്തിയാക്കുകയും ചെയ്തു. എന്താണ് കൊടുത്തുവിടുന്നതെന്ന് ആരും അറിയേണ്ടെന്ന മകളുടെ നിർദ്ദേശം പാലിക്കാനും അവർ മറന്നില്ല. എന്നാൽ ഡെലിവറി ഏജൻറ് എത്തിച്ച ചോറ്റുപാത്രം കണ്ട് ഒരുവേള ബാഹറിന് ചിരിയടക്കാനായില്ല. അമ്മ എയർ പോഡ് കവറിനുള്ളിലിട്ട് അത് ചോറ്റുപാത്രത്തിനുള്ളിലാക്കിയാണ് മകൾക്ക് എത്തിച്ചുനൽകിയത്.

തന്റെ അമ്മയുടെ കരുതൽ ചിത്രങ്ങളടക്കം അവർ എക്‌സിൽ പങ്കുവച്ചു. പിന്നാലെ പലരും സമാനമായ അനുഭവങ്ങൾ കമന്റ് ബോക്സിൽ പങ്കുവച്ചു. അമ്മമാർ മക്കളെക്കാൾ സ്മാർട്ടാണെന്നായിരുന്നു ഒരാളുടെ കമന്റ്. എയർ പോഡിന് അമ്മ Z+ കാറ്റഗറി സുരക്ഷ നൽകിയെന്ന് മറ്റൊരു യൂസർ പറഞ്ഞു. “നിങ്ങളുടെ അമ്മ ആയതുകൊണ്ട് ഇതൊരു ചോറ്റുപാത്രത്തിൽ കൊടുത്തുവിട്ടു, എന്റെ അമ്മ ആയിരുന്നെങ്കിൽ മൂന്നും നാലും കവറുകൾകൊണ്ടത് പാക്ക് ചെയ്തേനെ” എന്നായിരുന്നു രസകരമായ മറ്റൊരു കമന്റ്. പോസ്റ്റ് ഇതിനോടകം 125,000 പേർ കണ്ടു കഴിഞ്ഞു.

forgot my AirPods at home today and asked mom to send them safely with a delivery guy without him knowing what it is and she packed it in a dabba! IN A DABBA??!! 😭😭😭 pic.twitter.com/SHV3mqlKkt

— Bahaar Batra (@Bahaarnotbahar) October 1, 2024