കോഴിക്കോട്: സാഹിത്യകാരനും തിരക്കഥാകൃത്തുമായ എംടി വാസുദേവൻ നായരുടെ വീട്ടിൽ മോഷണം നടന്നതായി പരാതി. കൊട്ടാരം റോഡിലുള്ള വീട്ടിലാണ് കവർച്ച നടന്നത്. 26 പവനോളം മോഷണം പോയതായി എംടിയുടെ ഭാര്യ സരസ്വതി പറഞ്ഞു. സംഭവത്തിൽ നടക്കാവ് പൊലീസ് കേസെടുത്ത് അന്വേഷണം ആരംഭിച്ചു.
മരതകം പതിപ്പിച്ച ലോക്കറ്റ്, മൂന്ന് മാല, വള, കമ്മൽ, ഡയമണ്ട് കമ്മൽ, ഡയമണ്ട് ലോക്കറ്റ് എന്നിവയാണ് മോഷണം പോയത്. സ്വർണം ബാങ്ക് ലോക്കറിലാണെന്നായിരുന്നു കുടുംബം സംശയിച്ചിരുന്നത്. എന്നാൽ പിന്നീട് നടത്തിയ പരിശോധനയിലാണ് സ്വർണം മോഷണം പോയതായി കുടുംബത്തിന് മനസിലായത്. ഇതോടെ പൊലീസിൽ പരാതിപ്പെടുകയായിരുന്നു.
സെപ്തംബർ 22നും 30നും ഇടയിൽ മോഷണം നടന്നുവെന്നാണ് സംശയം. സിസിടിവി ദൃശ്യങ്ങൾ ഉൾപ്പെടെ പരിശോധിച്ച് വരികയാണെന്ന് പൊലീസ് അറിയിച്ചു.
