ചില ജലാശയങ്ങളിൽ ഇറങ്ങുമ്പോൾ മീനുകൾ കൂട്ടമായി കാലിൽ പൊതിയുന്നത് സർവസാധാരണമാണ്. ഇത് നല്ലതാണ്. റിലാക്സ് ആകാനും ശരീരത്തിലെ രക്തപ്രവാഹം വർദ്ധിക്കാനും ഫിഷ് സ്പാ സഹായിക്കും. കുഞ്ഞു മീനുകൾ കൂട്ടമായി ശരീരത്തിൽ വന്ന് തൊടും. നല്ലതാണല്ലോ എന്നോർത്ത് നമ്മൾ പലപ്പോഴും നിന്നു കൊടുക്കാറുമുണ്ട്. എന്നാൽ എല്ലാ മീനുകളും അത്ര നല്ലതല്ല. വളരെ അപകടകാരികളായ ചില മീനുകളും ഉണ്ട്. അതിലൊന്നായി ചിലർ ചൂണ്ടിക്കാണിക്കുന്ന മത്സ്യമാണ് കാൻഡിരു.
ബൊളീവിയ, ബ്രസീൽ, കൊളംബിയ, ഇക്വഡോർ എന്നീ രാജ്യങ്ങളിൽ കാണപ്പെടുന്ന ആമസോൺ തടത്തിൽ നിന്നുള്ള ട്രൈക്കോമൈക്ടെറിഡേ കുടുംബത്തിലെ പരാന്നഭോജികളായ ശുദ്ധജല ക്യാറ്റ്ഫിഷാണ് കാൻഡിരു. കാനറോ, ടൂത്ത്പിക്ക് ഫിഷ് അല്ലെങ്കിൽ വാമ്പയർ ഫിഷ് എന്നും ഇവ അറിയപ്പെടുന്നു. ചില കാൻഡിരു സ്പീഷീസുകൾ 40 സെൻ്റീമീറ്റർ (16 ഇഞ്ച്) വരെ നീളത്തിൽ വളരുന്നതായി അറിയപ്പെടുന്നുണ്ടെങ്കിലും പൊതുവെ അവ ചെറുതാണ്. ചെറുതാണെങ്കിലും എന്തുകൊണ്ടാണ് കാൻഡിരു മത്സ്യം അപകടകാരികൾ ആണെന്ന് പറയുന്നത്.
ഈ ചെറിയ മീൻ മനുഷ്യ മൂത്രനാളിയിലും മറ്റ് ശാരീരിക ദ്വാരങ്ങളിലും ആക്രമണം നടത്തുകയും പരാന്നഭോജികൾ ഉണ്ടാക്കുകയും ചെയ്യുന്നു എന്ന പ്രവണതയ്ക്ക് പേരുകേട്ടതാണ്. ജലാശയത്തിൽ കുളിക്കാൻ ഇറങ്ങുന്ന മനുഷ്യരുടെയും നീന്തുന്ന മൃഗങ്ങളുടെയും മൂത്രനാളിയിൽ ഈ മീൻ പ്രവേശിക്കും. ഈ സമയത്ത് അത് അതിന്റെ ഗിൽ കവറുകളിൽ ചെറിയ മുള്ളുകൾ സ്ഥാപിക്കും. ഇത് മീൻ കടന്നുപോകുന്ന വഴി മുറിവേൽപ്പിക്കുന്നു. അതുമൂലം വീക്കം, രക്തസ്രാവം, കൂടാതെ ഇരയ്ക്ക് മരണം വരെ സംഭവിക്കും എന്നാണ് പറയപ്പെട്ടിരുന്നത്.
സാധാരണയായി വലിയ മത്സ്യങ്ങളുടെ ചെകിളകൾക്കിടയിൽ വസിക്കുന്ന ഒരു പരാന്നഭോജിയാണ് കാൻഡിരു. അവിടെ രക്തം ഭക്ഷിച്ച് കഴിയുന്നു. വലിയ മത്സ്യത്തിന്റെ ചെകിളയിൽ നിന്ന് പുറന്തള്ളുന്ന അമോണിയയുടെ മണമുള്ള ജലത്തെ പിന്തുടർന്ന് കാൻഡിരു ആ മത്സ്യത്തെ കണ്ടെത്തും. അതിനാൽ തന്നെ മനുഷ്യ മൂത്രത്തിൽ അമോണിയയുടെ ഗന്ധം പിന്തുടർന്ന് കാൻഡിരു എത്തുമെന്ന് ഒരു സമയത്ത് വിശ്വസിച്ചിരുന്നു.
വാസ്തവത്തിൽ, ഈ മത്സ്യം നദികളിൽ മൂത്രമൊഴിക്കുന്ന മനുഷ്യരുടെ ശരീരത്തിൽ പ്രവേശിക്കുന്നതിനെക്കുറിച്ചുള്ള നിരവധി കഥകൾ കേട്ടിട്ടുണ്ടെങ്കിലും രേഖാമൂലമുള്ള ഒരു കേസ് 1997ലാണ് റിപ്പോർട്ട് ചെയ്തത്. തുടർന്ന് നടത്തിയ അന്വേഷണത്തിൽ മത്സ്യം മനുഷ്യ മൂത്രത്തിൽ ‘ആകർഷിക്കപ്പെടുന്നില്ല’ എന്ന് കണ്ടെത്തി. മൂത്രനാളിയിലേക്കുള്ള ദ്വാരം വളരെ ചെറുതാണെന്നും, ഒരു ചെറിയ മത്സ്യം പോലും അതിലൂടെ കടന്നുപോകാൻ വളരെയധികം ശ്രമിക്കേണ്ടതുണ്ടെന്നും ഗവേഷകർ പറയുന്നു.
എന്നിരുന്നാലും, കാൻഡിരു മത്സ്യത്തെ ഇന്ന് പലർക്കും ഭയമാണ്. കാൻഡിരുവിനെ നിസ്സാരമായി കാണേണ്ടതില്ലെന്നാണ് ആളുകൾ ഇപ്പോഴും പറയുന്നത്. 2021 ൽ ഒരു കുട്ടിയുടെ ശരീരത്തിൽ കാൻഡിരു പിടിവിടാതെ കടിച്ചിരിക്കുന്ന ഒരു ചിത്രം പുറത്തുവന്നിരുന്നു. രക്തം കുടിക്കാൻ വേണ്ടിയാണ് ഈ മത്സ്യം ശരീരത്തിൽ കടിച്ചിരിക്കുന്നത്. ഏറെ പ്രയാസപ്പെട്ടാണ് മത്സ്യത്തെ ശരീരത്തിൽ നിന്ന് പറിച്ചു മാറ്റിയത്. ഗവേഷകർ എത്രയൊക്കെ പറഞ്ഞാലും, കാൻഡിരു മത്സ്യം അത്ര നിസ്സാരക്കാരനല്ല എന്നാണ് ഈ സംഭവം ചൂണ്ടിക്കാണിക്കുന്നത്.
