കട്ടപ്പന: ഒന്നരമസമായി ശമ്പളം ലഭിക്കാത്തതിൽ പ്രതിഷേധവുമായി KSRTC ജീവനക്കാർ. ചെണ്ടകൊട്ടി ഭിക്ഷ യാചിച്ചാണ് ജീവനക്കാർ പ്രതിഷേധിക്കുന്നത്. കട്ടപ്പന ഡിപ്പോയിലെ KSRTC ജീവനക്കാരാണ് വേറിട്ട പ്രതിഷേധം സംഘടിപ്പിച്ചത്. KSRTC എംപ്ലോയീസ് സംഘ് (BMS) ന്റെ നേതൃത്വത്തിലാണ് പുതിയ ബസ്റ്റാൻഡിലെ പ്രതിഷേധം.
കൃത്യമായി ജോലിചെയ്തിട്ടും 45 ദിവസമായി ശമ്പളം ലഭിക്കുന്നില്ലെന്ന് ജീവനക്കാർ ആരോപിച്ചു. എല്ലാമാസവും ഒന്നാം തീയതി KSRTC ജീവനക്കാർക്ക് ശമ്പളം കൃത്യമായി നൽകുമെന്ന് മുഖ്യമന്ത്രി പറഞ്ഞിരുന്നു. എന്നിട്ടും പ്രയോജനമില്ലെന്ന് കണ്ടതോടെയാണ് പ്രതിഷേധിക്കേണ്ടി വരുന്നതെന്നും ജീവനക്കാർ പറഞ്ഞു.
ശമ്പളം മുടങ്ങിയതോടെ കുട്ടികളുടെ പഠനവും മാതാപിതാക്കളുടെ ചികിത്സയും മുടങ്ങുന്ന അവസ്ഥയാണ്. വീട്ടുചെലവുകൾക്കും പണം കണ്ടെത്താനാകാതെ പ്രതിസന്ധിയിലാണ്. കഴിഞ്ഞ മാസം 240 കോടി രൂപയിലധികം വരുമാനം ലഭിച്ചെന്നാണ് വകുപ്പ് മന്ത്രി അവകാശപ്പെടുന്നത്. എന്നിട്ടും ശമ്പളം കൃത്യമായി ലഭിക്കുന്നില്ലെന്ന് പ്രതിഷേധക്കാർ ചൂണ്ടിക്കാട്ടി. എംപ്ലോയീസ് സംഘ് ജില്ലാ ട്രഷറർ പികെ പ്രകാശ്, കട്ടപ്പന യൂണിറ്റ് പ്രസിഡന്റ് തോമസ് മാത്യു, സെക്രട്ടറി പിവി ജോണി എന്നിവരുടെ നേതൃത്വത്തിലായിരുന്നു സമരം.
