തിരുവനന്തപുരം: മഹീന്ദ്ര സൂപ്പർ ലീഗ് കേരളയിൽ സെമി ബർത്തിനായി പോരാട്ടം സജീവമാക്കി ഫോഴ്സ കൊച്ചി. തിരുവനന്തപുരം കൊമ്പൻസിനെ ഫോഴ്സ കൊമ്പുകുത്തിച്ചു. 3- 1 നായിരുന്നു ഫോഴ്‌സയുടെ വിജയം. ചന്ദ്രശേഖരൻ നായർ സ്റ്റേഡിയത്തിൽ നടന്ന ഒൻപതാം റൗണ്ടിലെ ആദ്യ മത്സരത്തിൽ കൊച്ചിക്കായി ഡോറിയൽട്ടൻ ഗോമസ് രണ്ടും റോഡ്രിഗസ് ഒരു ഗോളും സ്‌കോർ ചെയ്തു.
സീസൺ, ഗണേശൻ എന്നിവരെ ബെഞ്ചിൽ ഇരുത്തിയാണ് കൊമ്പൻസ് കളത്തിലിറങ്ങിയത്. അർജുൻ ജയരാജ് ആസിഫ് കെ, എന്നിവർക്ക് ഫോഴ്‌സയും ആദ്യ ഇലവനിൽ അവസരം നൽകിയില്ല. മഴയിൽ കുതിർന്ന ഗ്രൗണ്ടിൽ എട്ടാം മിനിറ്റിൽ തന്നെ കൊച്ചി ലീഡ് നേടി. സ്വന്തം ഹാഫിൽ നിന്നുള്ള ലോങ് പാസ് പിടിച്ചെടുത്ത ഡോറിയൽട്ടൻ ഗോമസ് രണ്ട് പ്രതിരോധക്കാർക്കിടയിൽ നിന്ന് കൃത്യമായി ഫിനിഷ് ചെയ്തു (10). ലീഗിൽ ബ്രസീലുകാരൻ നേടുന്ന മൂന്നാമത്തെ ഗോൾ.
ഇരുപത്തിരണ്ടാം മിനിറ്റിൽ അക്മൽ ഷാനിന്റെ പാസ് പിടിച്ചെടുത്ത് ഓട്ടിമർ ബിസ്പൊ പറത്തിയ കരുത്തുറ്റ ഷോട്ട് കൊച്ചി ഗോളി ഹജ്മൽ കോർണർ വഴങ്ങി അത്ഭുതകരമായി രക്ഷപ്പെടുത്തി. അറുപതാം മിനിറ്റിൽ കൊമ്പൻസ് ശിഹാദ്, ഗണേശൻ എന്നിവരെ കൊണ്ടുവന്നു. അതിനിടെ കൊച്ചി ഗോൾ കീപ്പർ ഹജ്മൽ മികച്ച രണ്ട് സേവുകൾ നടത്തി. അറുപത്തിയേഴാം മിനിറ്റിലാണ് കൊമ്പൻസ് സമനില നേടിയത്. മുഹമ്മദ് അസ്ഹർ വലത് വിങിൽ നിന്ന് നൽകിയ ക്രോസ് ഫാസ്റ്റ് ടൈം ടച്ചിലൂടെ ഓട്ടിമർ ബിസ്പൊ ഗോളാക്കി മാറ്റി. കൊമ്പൻസിന്റെ ആശ്വാസ ഗോൾ.
ഒരു മഞ്ഞക്കാർഡ് വഴങ്ങിയെങ്കിലും ആദ്യ പകുതിയിൽ കൊമ്പൻസ് നായകൻ പാട്രിക് മോട്ട ത്രൂ പാസുകളുമായി കളം നിറഞ്ഞു. എന്നാൽ അവയൊന്നും ഗോളാക്കി മാറ്റാൻ മുന്നേറ്റനിരയിലെ സഹതാരങ്ങൾക്ക് കഴിഞ്ഞില്ല.
കളി അവസാനിക്കാൻ രണ്ട് മിനിറ്റ് ശേഷിക്കേ കൊച്ചി രണ്ടാം ഗോൾ കുറിച്ചു. ഫ്രീകിക്കിൽ നിന്ന് വന്ന പന്ത് കൊമ്പൻസ് ഗോളി സാന്റോസ് തടുത്തിട്ടത് റോഡ്രിഗസ് പോസ്റ്റിലേക്ക് അടിച്ചു കയറ്റി (21). ഇഞ്ചുറി സമയത്ത് കൊമ്പൻസ് താരം ബാദുഷ് രണ്ടാം മഞ്ഞ കാർഡും ചുവപ്പും വാങ്ങി പുറത്തു പോയതിനു പിന്നാലെ ഡോറിയൽട്ടൻ ആണ് മൂന്നാമത്തെ ഗോൾ നേടിയത്.
നിലവിൽ ഒൻപത് കളികളിൽ 13 പോയന്റുമായി കൊച്ചി മൂന്നാം സ്ഥാനത്താണ്. 12 പോയന്റുള്ള കൊമ്പൻസ് നാലാമത്. സെമി ടിക്കറ്റ് ഉറപ്പിക്കാൻ ഇരു ടീമുകൾക്കും അവസാന റൗണ്ട് മത്സരം വരെ കാത്തിരിക്കണം.
ഒക്ടോബർ 26 ന് തൃശൂർ മാജിക് എഫ്‌സി കാലിക്കറ്റ് എഫ്‌സിയെ നേരിടും. മഞ്ചേരി പയ്യനാട് സ്റ്റേഡിയത്തിൽ വൈകീട്ട് 7.30 ന് കിക്കോഫ്. സെമി ഫൈനൽ ഉറപ്പിച്ച കാലിക്കറ്റ് അപരാജിത കുതിപ്പ് തുടരാൻ ശ്രമിക്കുമ്പോൾ ഇതിനോടകം പുറത്തായി കഴിഞ്ഞ തൃശൂരിന് ലീഗിലെ ആദ്യ വിജയമാണ്സ്വപ്നം.
