സാധാരണ പന്നികളിൽ നിന്ന് തികച്ചും വ്യത്യസ്തമായ ഒന്നാണ് ബാബിറൂസകൾ . ഇന്തൊനീഷ്യയിലെ സുലവെസിയിലും തൊട്ടടുത്ത ദ്വീപുകളിലുമാണ് ഇവ കാണപ്പെടുന്നത് . ആൺ ബാബിറൂസകൾക്ക് മുകൾ നിരയിലെ രണ്ടു പല്ലുകൾ മൂക്കിനു മുകളിലൂടെ മുകളിലേക്ക് വളർന്നു നിൽക്കാറുമുണ്ട്.
മൂക്കിന്റെ മുകൾഭാഗത്ത് നിന്ന് നീണ്ടുനിൽക്കുന്ന പല്ലുകൾ കൊമ്പുകൾ പോലെ കാണപ്പെടുന്നു, അങ്ങനെയാണ് ബാബിറൂസകൾക്ക് ഈ പേര് ലഭിച്ചതും. മലായ് ഭാഷയിൽ ബാബിറൂസ എന്ന വാക്കിന്റെ അർത്ഥം ” മാൻ പന്നി ” എന്നാണ്. ഏകദേശം 40,000 വർഷങ്ങൾക്ക് മുമ്പുള്ള ഗുഹാചിത്രങ്ങളിൽ അവ കാണപ്പെടുന്നതിനാൽ ബാബിറുസകളെ ചിലപ്പോൾ “ചരിത്രാതീത പന്നികൾ” എന്നും വിളിക്കാറുണ്ട്.
എന്തുകൊണ്ടാണ് ആൺ ബാബിറൂസകൾക്ക് ഈ കൊമ്പുകൾ ഉള്ളതെന്ന് ശാസ്ത്രജ്ഞർക്ക് കൃത്യമായി അറിയില്ല. ശത്രുക്കളിൽ നിന്ന് രക്ഷപെടാനും , പോരടിക്കാനുമാണ് ഇത് ഉപയോഗിച്ചിരുന്നതെന്നാണ് ആദ്യ കാലങ്ങളിൽ ജീവശാസ്ത്രജ്ഞർ വിശ്വസിച്ചത് . ഇണകളെ ആകർഷിക്കാനാണെന്നും നിഗമനങ്ങൾ ഉണ്ട് . എന്നാൽ ഇതൊന്നും ശാസ്ത്രീയമായി തെളിയിക്കപ്പെട്ടില്ല . ബാബിറൂസകൾ കൊമ്പുകൾ പോരടിക്കാൻ ഉപയോഗിക്കുന്നില്ല , കാരണം അവയുടെ കൊമ്പുകൾ ദുർബലമാണ്, ഇത് യുദ്ധത്തിന് അനുയോജ്യമല്ല. ഇന്തോനേഷ്യൻ ദ്വീപുകളായ സുലവേസി, ബുറു, ടോഗിയൻ, സുല ദ്വീപസമൂഹങ്ങളിലെ മഴക്കാടുകളിലെ ചതുപ്പുനിലങ്ങളിലാണ് ഇവ വസിക്കുന്നത് .
ലോകത്ത് മറ്റൊരിടത്തും ഇവ കാണപ്പെടുന്നില്ല. 2 അടി ഉയരവും 3 അടി നീളവും 200 പൗണ്ടിൽ കൂടുതൽ (90 കിലോഗ്രാം) ഭാരവുമുള്ളവയാണ് ഈ പന്നികൾ .
2002 വരെ, എല്ലാ ബാബിറൂസകളും ഒരൊറ്റ ഇനത്തിൽ പെട്ടതാണെന്ന് കരുതപ്പെട്ടിരുന്നു. ഇപ്പോൾ അറിയപ്പെടുന്ന മൂന്ന് ഇനം ബാബിറൂസകളുണ്ട്. അതിലൊന്നാണ് സുലവേസി ബാബിറൂസ . ഇവയ്ക്ക് തവിട്ട്-ചാര നിറമാണ്. സുലവേസിയിലാണ് ഇവ വസിക്കുന്നത് . ബുറു ബാബിറുസ കട്ടിയുള്ളതും സ്വർണ്ണ നിറത്തിലുള്ളതുമായ നിറമാണിതിന്. ബുറു , സുല ദ്വീപുകളിലും ഇവ കാണപ്പെടാറുണ്ട്. രോമമില്ലാത്ത ടോഗിയൻ ബാബിറുസ ടോഗിയൻ ദ്വീപുകളിൽ മാത്രമേ കാണപ്പെടുന്നുള്ളൂ.
