ഏറ്റവും സൗകര്യപ്രദമായ ഒന്നാണ് ഓൺലൈൻ ഷോപ്പിംഗ്. അതുകൊണ്ട് തന്നെ ഇന്നത്തെ കാലത്ത് നിരവധി ഉപഭോക്താക്കൾ വലിയ തോതിൽ ആശ്രയിക്കുന്നതും ഇ-കൊമേഴ്സ് പ്ലാറ്റ്ഫോമുകളെയാണ്. ഓർഡർ ചെയ്ത് വരുന്ന സാധനം തുറന്നുനോക്കാൻ പൊതുവെ വലിയ ആകാംക്ഷയായിരിക്കും ഉപഭോക്താവിന്. ഒരുപാട് പ്രതീക്ഷയോടെയാണ് ഓരോ ഉപഭോക്താവും തങ്ങളെ തേടിയെത്തുന്ന ഓൺലൈൻ പാഴ്സൽ പൊളിച്ചുനോക്കുക. അങ്ങനെ ആമസോണിൽ നിന്നെത്തിയ പാഴ്സൽ തുറന്നുനോക്കിയ യുവതി ഛർദ്ദിച്ച് അവശയായ സംഭവമാണ് വാർത്തകളിൽ ഇപ്പോൾ ഇടംപിടിക്കുന്നത്.
ഒരു ബൈസിക്കിൾ ഹെൽമെറ്റായിരുന്നു യുവതി ആമസോണിൽ നിന്ന് ഓർഡർ ചെയ്തത്. ആമസോണിൽ നിന്ന് സ്ഥിരമായി സാധനങ്ങൾ വാങ്ങാറുള്ള റേച്ചൽ മെക്ആദത്തിനെ ഇത്തവണ കാത്തിരുന്നത് ഹെൽമെറ്റായിരുന്നില്ല. സന്തോഷത്തോടെ പാഴ്സൽ തുറന്നുനോക്കിയ റേച്ചൽ ഞെട്ടി. അതിരൂക്ഷ ദുർഗന്ധത്തിന് പിന്നാലെ അവൾ കണ്ടകാഴ്ച ആരെയും ഓക്കാനിപ്പിക്കുന്നതായിരുന്നു. അതുകൊണ്ട് തന്നെ റേച്ചൽ നേരെ പോയി ഛർദ്ദിച്ചു.
ആമസോണിൽ നിന്നെത്തിയ ബോക്സിൽ ഹെൽമെറ്റിന് പകരം കുറെ ബ്രഡ്ക്രംപ്സ് ഉണ്ടായിരുന്നു, ഒപ്പം കുറേ എലിക്കാഷ്ടവും. ഒന്നുകൂടി ബോക്സ് തുറന്നപ്പോൾ റേച്ചൽ കണ്ടതാകട്ടെ, പാതി അഴുകിയ എലിയുടെ ജഡം. ബോക്സ് താഴെയിട്ട് റേച്ചൽ ഓടി, കുറേ ഛർദ്ദിച്ചു. ആമസോണിൽ നിന്ന് നേരിട്ട ദുരനുഭവത്തിന്റെ ഞെട്ടലിൽ നിന്ന് മുക്തമാകാൻ പോലും അവൾക്ക് സമയമെടുത്തു.
ചത്ത എലി അഴുകാൻ തുടങ്ങിയാൽ ആ പ്രദേശത്ത് പോലും ആളുകൾക്ക് നിൽക്കാൻ കഴിയില്ലെന്നിരിക്കെ ആണ് റേച്ചലിന് ദുരനുഭവം നേരിട്ടത്. അന്നേദിവസം തനിക്ക് ഭക്ഷണം കഴിക്കാൻ പോലും പറ്റിയില്ലെന്നും റേച്ചൽ പറയുന്നു. സംഭവത്തിന് തൊട്ടുപിന്നാലെ അവർ ആമസോൺ കസ്റ്റമർ സർവീസിൽ ബന്ധപ്പെട്ട് വിഷയം അവതരിപ്പിച്ചു. ഖേദം രേഖപ്പെടുത്തിയ ആമസോൺ ഫുൾ റീഫണ്ട് നൽകുകയും ചെയ്തു.
