ഇന്ത്യയുടെ ആദ്യ എഐ ലൈബ്രേറിയനായി വേദ (VEDA). വിദ്യാർത്ഥികൾ, അദ്ധ്യാപകർ, ഗവേഷകർ തുടങ്ങി നിരവധി പേരെ സഹായിക്കാൻ വേദ എഐയ്ക്ക് സാധിക്കും. എല്ലാ സമയവും വേദയുടെ സേവനങ്ങൾ ലഭ്യമാകും. എല്ലാവരിലേക്കും അറിവ് ലഭ്യമാക്കുക ലക്ഷ്യമിട്ട് പ്രവർത്തിക്കുന്ന സംഘടനയായ വൺ ലൈബ്രറി പെർ വില്ലേജ് (OLPV) ആണ് വേദ രൂപകൽപന ചെയ്തിരിക്കുന്നത്.
പുസ്തകങ്ങൾ, ലേഖനങ്ങൾ, പഠനത്തെ സഹായിക്കുന്ന മറ്റ് എഴുത്തുകൾ തുടങ്ങി നിരവധി കാര്യങ്ങളിലേക്ക് ആക്സസ് നൽകാൻ ഇതിനാകും. വിവിധ വിഷയങ്ങളിലുള്ള ചോദ്യങ്ങൾക്ക് വേദ ഉത്തരം നൽകും. അറിവ് നേടാൻ ആഗ്രഹിക്കുന്ന ഏതൊരാൾക്കും മുതൽക്കൂട്ടാകും വേദ എഐ എന്ന് നിസംശയം പറയാം.
ത്രിഡി മാതൃകയിൽ പുസ്തകങ്ങളും പഠനത്തിന് ഉപകരിക്കുന്ന ഉള്ളടക്കങ്ങളും സൂക്ഷിച്ച് വയ്ക്കാനും സംവദിക്കാനും സാധിക്കുന്ന മെറ്റാവേഴ്സ് (Metaverse) എന്ന സൗകര്യവും ഇതിൽ ലഭ്യമാണ്. ഒരേ വിഷയവുമായി ബന്ധപ്പെട്ട് വിവിധ കാര്യങ്ങളെ കുറിച്ചുള്ള സംശയങ്ങളും മറ്റ് കാര്യങ്ങളും ചോദിച്ചറിയാനും സൂക്ഷിക്കാനും സാധിക്കും. വെർച്വൽ റീഡിംഗ് റൂം, പഠന ഇടങ്ങൾ, എന്നിവ സൃഷ്ടിക്കാൻ വേദ സഹായിക്കും.
വേദയെ അവതരിപ്പിച്ചതിന് പുറമേ രാജ്യത്തെ എല്ലാ ഗ്രാമങ്ങളിലും മിനി-ലൈബ്രറികൾ സജ്ജമാക്കാനുള്ള OLPV-യുടെ ശ്രമങ്ങൾ പുരോഗമിക്കുകയാണ്. അത്യാധുനിക വിദ്യാഭ്യാസ സംവിധാനങ്ങൾ ഉപയോഗപ്പെടുത്തി പഠനാനുഭവങ്ങൾ മെച്ചപ്പെടുത്താൻ ഈ മിനി ലൈബ്രറികൾ സഹായിക്കും.
