വർഷങ്ങൾക്ക് ശേഷം മലയാളത്തിന്റെ താരരാജാക്കന്മാർ ഒന്നിക്കുന്ന ചിത്രം അണിയറയിൽ ഒരുങ്ങുന്നുവെന്ന വാർത്തകൾ അടുത്തിടെ പുറത്തുവന്നിരുന്നു. ഔദ്യോഗിക പ്രഖ്യാപനം ഉണ്ടായില്ലെങ്കിലും മഹേഷ് നാരായണനാണ് ചിത്രം സംവിധാനം ചെയ്യുന്നതെന്നാണ് വിവരം. ചിത്രത്തിൽ ജോയിൻ ചെയ്യുന്നതിനായി മോഹൻലാൽ ശ്രീലങ്കയിലേക്ക് തിരിച്ചിരുന്നു. ഇപ്പോഴിതാ മമ്മൂട്ടിയും ചിത്രത്തിൽ ജോയിൻ ചെയ്തിരിക്കുകയാണ്.
ചിത്രത്തിന്റെ ആദ്യഘട്ട ഷൂട്ടിംഗിനായി മമ്മൂട്ടി ശ്രീലങ്കയിലെത്തി. മമ്മൂട്ടിക്കൊപ്പം ഭാര്യ സുൽഫത്ത്, കുഞ്ചാക്കോ ബോബൻ, ആന്റണി പെരുമ്പാവൂർ എന്നിവരുമുണ്ട്. കൊളംബോയ്ക്ക് പോകുന്നതിനായി കൊച്ചി വാമനത്താവളത്തിൽ എത്തിയ മമ്മൂട്ടിയുടെ ദൃശ്യങ്ങൾ സമൂഹമാദ്ധ്യമങ്ങളിൽ എത്തിയിരുന്നു.
രണ്ട് ദിവസം മുമ്പാണ് മോഹൻലാൽ ശ്രീലങ്കയിലെത്തിയത്. സിനിമയുടെ ആദ്യഘട്ട ചിത്രീകരണം ശ്രീലങ്കയിലാണ് നടക്കുന്നത്. യുകെ, അസർബൈജാൻ, ദുബായ്, ഡൽഹി, ഹൈദരാബാദ്, വിശാഖപട്ടണം എന്നിവിടങ്ങളിലായിരിക്കും ഷൂട്ടിംഗ്. 80 കോടിയോളം ബജറ്റിലാണ് ചിത്രം ഒരുങ്ങുന്നത്. കരൺ ജോഹർ ചിത്രങ്ങളുടെ കാമറമാനായ മാനുഷാണ് സിനിമയുടെ ഛായാഗ്രാഹകൻ.
വർഷങ്ങൾക്ക് ശേഷം മോഹൻലാലിനെയും മമ്മൂട്ടിയെയും ഒന്നിച്ച് ബിഗ്സ്ക്രീനിൽ കാണാൻ കഴിയുന്നതിന്റെ സന്തോഷത്തിലാണ് ആരാധകർ. 2013-ൽ പുറത്തിറങ്ങിയ കടൽ കടന്നൊരു മാത്തുക്കുട്ടി എന്ന സിനിമയിലാണ് അവസാനമായി ഇരുവരും ഒന്നിച്ചെത്തിയത്.
