എരിവുള്ള ആഹാരം ആരോഗ്യത്തിന് നല്ലതല്ലെന്ന് കാലങ്ങളായി കേട്ട് തഴമ്പിച്ച വാചകമാണ്. സ്ഥിരമായി എരിവുള്ള ഭക്ഷണം ഹൃദയത്തിന് പണി തരുമെന്നാണ് പറയാറ്. എന്നാൽ സംഭവം അങ്ങനെയല്ലെന്ന് പറയുകയാണ് പ്രമുഖ ഹൃദ്രോഗ വിദഗ്ധനും ഹൈദരബാദിലെ കെയർ ഹോസ്പിറ്റലിലെ കൺസൾട്ടൻ്റ് കാർഡിയോളജിസ്റ്റുമായ ഡോ. വിനോത്ത്.
എരിവുള്ള ഭക്ഷണവും ഹൃദയാഘാതവും തമ്മിൽ യാതൊരുവിധ ബന്ധവുമില്ലെന്നാണ് ഡോക്ടർ പറയുന്നത്. ക്യാപ്സൈസിൻ അടങ്ങിയ ആഹാരങ്ങൾ ആരോഗ്യത്തിന് ഗുണം ചെയ്യുന്നുണ്ടെന്നാണ് അദ്ദേഹം പറയുന്നത്. എരിവുള്ള ഭക്ഷണത്തിന്റെ ഗുണങ്ങളറിയാം..
എരിവുള്ള ഭക്ഷണം കഴിച്ചാൽ ശരീരത്തിന് ചൂട് അനുഭവപ്പെടുന്നത് സ്ഥിരമാണ്. ഇതിലടങ്ങിയിരിക്കുന്ന ക്യാപ്സൈസിനാണ് ഇതിന് കാരണം. വീക്കം, സമ്മർദ്ദം എന്നിവ കുറയ്ക്കാൻ ഇത് സഹായിക്കും. ശരീരഭാരം നിയന്ത്രിക്കാനും ഹൃദ്രോഗ സാധ്യത കുറയ്ക്കാനും മുളകും മറ്റ് എരിവുള്ള ഭക്ഷണങ്ങളും സഹായിക്കുന്നു. ഹൃദയത്തിന്റെ ആയാസം കുറയ്ക്കാനും രക്തസമ്മർദ്ദം കുറയ്ക്കാനും എരിവുള്ള ആഹാരത്തിന് സാധിക്കുമെന്നാണ് പഠനങ്ങൾ പറയുന്നത്.
ക്യാപ്സൈസിൻ ദഹനനാളത്തിലേക്കുള്ള രക്തയോട്ടം വർദ്ധിപ്പിക്കുന്നു. അൾസർ ഉണ്ടാകാനുള്ള സാധ്യത കുറയ്ക്കുന്നു. വാരിവലിച്ച് എരിവ് കഴിക്കാതെ മിതമായ അളവിൽ കഴിക്കണമെന്നത് പ്രത്യേകം ശ്രദ്ധിക്കണം. എരിവുള്ള ഭക്ഷണങ്ങളും സുഗന്ധ വ്യഞ്ജനങ്ങളും ഉപയോഗിക്കുന്നതിന് മുൻപായി ആരോഗ്യ വിദഗ്ധനെ കാണുന്നത് ഉചിതമായിരിക്കും. മറ്റ് രോഗങ്ങളുള്ളവർ ഡോക്ടറുടെ നിർദ്ദേശ പ്രകാരം മാത്രമേ എരിവ് അധികം കഴിക്കാവൂ.
അധികമായാൽ അമൃതും വിഷമെന്ന് പറയുന്നത് പോലെ എരിവും അധികമാകരുത്. മസാലകളും മറ്റ് എരിവും അടങ്ങിയ ആഹാരം വാരിവലിച്ച് കഴിക്കാതിരിക്കാൻ ശ്രമിക്കണം. കുരുമുളക്, ഇഞ്ചി, വെളുത്തുള്ളി, മഞ്ഞൾ തുടങ്ങിയ സുഗന്ധവ്യഞ്ജനങ്ങളും ഭക്ഷണത്തിൽ ഉൾപ്പെടുത്തുക. ദഹനനാളത്തിന് അസ്വസ്ഥകൾ ഉണ്ടാകാതിരിക്കാനായി തൈര്, അവക്കാർഡോ, കുക്കുമ്പർ പോലെയുള്ള കൂടി ഭക്ഷണത്തിൽ ഉൾപ്പെടുത്തണം.
