മോഹൻലാലിനെ നായകനാക്കി സിബി മലയിൽ സംവിധാനം ചെയ്ത ചിത്രമാണ് ‘ദൂരെ ദൂരെ ഒരു കൂടുകൂട്ടാം’. ശ്രീനിവാസൻ തിരക്കഥ ഒരുക്കിയ ചിത്രത്തിൽ നെടുമുടി വേണു, മേനക, സുകുമാരി, മാമുക്കോയ, ജഗതി ശ്രീകുമാർ, പപ്പു തുടങ്ങിയ വമ്പൻ താരനിരയാണ് അണിനിരന്നത്. വർഷങ്ങൾക്കിപ്പുറം സിനിമയെ കുറിച്ചുള്ള ഓർമകൾ പങ്കുവയ്‌ക്കുകയാണ്
സംവിധായകൻ സിബി മലയിൽ. സിനിമയിലെ സൂപ്പർ ഹിറ്റ് ഡയലോഗായ സോൾട്ട് മാംഗോം ട്രീ ഉണ്ടായതിനെ കുറിച്ചാണ് പറയുന്നത്.
‘ചെറുപ്പത്തിൽ എനിക്ക് ഭക്ഷണത്തിന്റെ പേരുകൾ ഇംഗ്ലീഷിലേക്ക് ട്രാൻസ്ലേറ്റ് ചെയ്യുന്ന സ്വഭാവമുണ്ടായിരുന്നു. അതെന്റെ ശീലമായിരുന്നു. ഉപ്പുമാവിനെ ഞാൻ സോൾട്ട് മാംഗോ ട്രീ എന്നാണ് പറഞ്ഞിരുന്നത്. ഇത് ഒരു ദിവസം ഞാൻ ശ്രീനിവാസനോട് പറഞ്ഞിരുന്നു. എന്നാൽ ഇതെല്ലാം മനസിൽ വച്ച് സിനിമയിൽ ഉപയോഗിക്കുമെന്ന് ഞാൻ ഒട്ടും പ്രതീക്ഷിച്ചിരുന്നില്ലെന്ന്’സിബി മലയിൽ പറഞ്ഞു.
ചിത്രത്തിൽ, അദ്ധ്യാപകനായെത്തിയ മോഹൻലാലിനോട് ഉപ്പുമാവിന്റെ ഇംഗ്ലീഷ് എന്തെന്ന് കുട്ടികൾ ചോദിക്കുമ്പോൾ സോൾട്ട് മാംഗോ ട്രീ എന്നാണ് പറഞ്ഞുകൊടുക്കുന്നത്. ഇന്നും പ്രേക്ഷകർക്കിടയിൽ പൊട്ടിച്ചിരി നിറയ്‌ക്കുന്നതാണ് മോഹൻലാലിന്റെ ആ ഡയലോഗ്.
