ന്യൂഡൽഹി : ഡിജിറ്റൽ സ്ട്രീമിംഗ് ലോകത്തേയ്ക്ക് കടന്ന് പ്രസാർഭാരതി .ഔദ്യോഗിക ഒടിടി പ്ലാറ്റ്ഫോമായി ‘ വേവ്സ് ‘ ആണ് അവതരിപ്പിച്ചിരിക്കുന്നത് . മലയാളം, ഇംഗ്ലീഷ്, ഹിന്ദി, തമിഴ് ഉൾപ്പെടെ 12-ഓളം ഇന്ത്യൻ ഭാഷകളിൽ വേവ്സ് ലഭ്യമാകും. “ഫാമിലി എൻ്റർടൈൻമെൻ്റ് കി നയി ലെഹർ” എന്ന പേരിൽ പ്രമോട്ട് ചെയ്തിരിക്കുന്ന ഈ പ്ലാറ്റ്ഫോം വൈവിധ്യമാർന്ന പ്രേക്ഷകരെ തൃപ്തിപ്പെടുത്തുന്നതിനാണ് രൂപകൽപ്പന ചെയ്തിരിക്കുന്നത്.
ഗോവയിൽ നടക്കുന്ന അന്താരാഷ്ട്ര ചലച്ചിത്ര മേളയുടെ (ഐഎഫ്എഫ്കെ) ഉദ്ഘാടന ചടങ്ങിൽ ഗോവ മുഖ്യമന്ത്രി പ്രമോദ് സാവന്ത് ആണ് പുതിയ ഒടിടി അവതരിപ്പിച്ചത്.65-ലധികം തത്സമയ ചാനലുകൾ, സിനിമകൾ, ഗെയിമുകൾ, ലൈവ് ഇവൻ്റുകൾ, ഓൺലൈൻ ഷോപ്പിങ് തുടങ്ങിയ സേവനങ്ങൾ പ്ലാറ്റ്ഫോമിൽ ലഭ്യമാകും.ഭാരത് നെറ്റ് ഇൻഫ്രാസ്ട്രക്ചർ പ്രയോജനപ്പെടുത്തി ഗ്രാമീണ മേഖലകളിലേക്ക് പോലും കടന്ന് ചെല്ലാൻ കഴിയും വിധമാണ് ‘ വേവ്സ് ‘ ഒരുക്കിയിരിക്കുന്നത് .
ദൂരദർശനിൽ മുൻപ് പ്രക്ഷേപണം ചെയ്തിരുന്ന ശക്തിമാൻ, രാമായണം, മഹാഭാരതം, ഹം ലോദ് തുടങ്ങിയ സീരിയലുകൾ ആയിരിക്കും വേവ്സിലൂടെ നിലവിൽ സംപ്രേക്ഷണം ചെയ്യുക. ഇതിനു പുറമെ പ്രധാന മന്ത്രിയുടെ ‘മൻ കി ബാത്ത്’ പരിപാടിയും അയോധ്യ രാമക്ഷേത്രത്തിലെ രാംലല്ല ആരതി തുടങ്ങിയ ലൈവ് പരിപാടികളും സംപ്രേക്ഷണം ചെയ്യും.ഡയമണ്ട് പ്ലാൻ,ഗോൾഡ് പ്ലാൻ തുടങ്ങി വിവിധ പ്ലാനുകളും ഒ ടി ടിയിൽ ഉണ്ട്.
