ശരീരഭാരം കുറയ്ക്കുക എന്നത് വലിയൊരു ടാസ്കായി തന്നെ ഏറ്റെടുത്തിരിക്കുന്നവരായിരിക്കും നമ്മളിൽ ഭൂരിഭാഗം പേരും. ഇതിനായി ജിമ്മിൽ പോക്കും, ഭക്ഷണം കുറച്ച് ഡയറ്റ് നോക്കുന്നതുമൊക്കെയായിരിക്കും പലരുടേയും ശീലം. എന്നാൽ എന്ത് എങ്ങനെ ചിട്ടയായി ചെയ്യണമെന്ന് ധാരണ ഇല്ലാത്തതിനാൽ പലർക്കും അവർ ചെയ്യുന്ന കാര്യങ്ങളിൽ ഫലം കിട്ടിയെന്ന് വരില്ല. ശരീരഭാരത്തിന്റെ പകുതിയോളം വിജയകരമായി കുറച്ചതിന്റെ കഥ തുറന്ന് പറഞ്ഞ് ഡിജിറ്റൽ ക്രിയേറ്ററായ നോനു.
കാർഡിയോ വ്യായാമങ്ങൾ ചെയ്യുന്നത് ശരീരത്തിന് വളരെ നല്ലതാണെന്നാണ് നോനു പറയുന്നത്. മുൻപ് അൽപ്പം ദൂരം നടക്കുന്നത് പോലും ചിന്തിക്കാൻ സാധിക്കുമായിരുന്നില്ലെന്നും, ഇന്ന് തന്റെ ജീവിതം തന്നെ മാറി മറിഞ്ഞുവെന്നും നോനു പറയുന്നു. ഓട്ടം, നടത്തം, സ്കിപ്പിങ് റോപ്പ്, തുടങ്ങി ഹൃദയമിടിപ്പ് കൂട്ടുന്ന ഏതൊരു വ്യായാമത്തേയും ധൈര്യമായി ഫിറ്റ്നസ് പ്രോഗ്രാമിൽ ഉൾപ്പെടുത്താമെന്നാണ് നോനു പറയുന്നത്.
ശരീരഭാരം കുറയ്ക്കുന്നതിന് മുൻപുള്ള ചിത്രവും അതിന് ശേഷമുള്ള ചിത്രവും നോനു സമൂഹമാദ്ധ്യമങ്ങളിൽ പങ്കുവച്ചിട്ടുണ്ട്. ” 130 കിലോ ശരീരഭാരമാണ് എനിക്ക് ഉണ്ടായിരുന്നത്. അത് 66 കിലോ കുറയ്ക്കാൻ ഇന്നെനിക്ക് സാധിച്ചു. ഇപ്പോൾ എന്റെ ശരീരഭാരം 64 കിലോയിലേക്ക് എത്തിയിരിക്കുകയാണ്. വ്യായാമം തുടങ്ങി ആദ്യ ദിവസങ്ങളിൽ 700 മീറ്റർ എത്തുമ്പോൾ തന്നെ മടുക്കുമായിരുന്നു. തൊട്ടടുത്ത ദിവസം അത് ഒരു കിലോമീറ്ററാക്കി കൂട്ടി. ഓരോ ദിവസങ്ങളിലും ഞാൻ നടക്കുന്ന ദൂരം കൂട്ടിക്കൊണ്ട് വന്നു.
ഓടുന്ന കാര്യം പണ്ട് ചിന്തിക്കാൻ പോലും കഴിയുമായിരുന്നില്ല. ശരീരഭാരം കൂടുതലാണെങ്കിൽ ഒത്തിരി ദൂരം ഓടുന്നതും നല്ലതല്ല. പക്ഷേ ഇന്നെനിക്ക് എല്ലാം സാധിക്കുന്നുണ്ട്. പരമാവധി കൊഴുപ്പിനെ എരിച്ചുകളയുക എന്നത് വലിയ പ്രാധാന്യമുള്ള കാര്യമാണ്. കാർഡിയോ അതിന് സഹായിക്കും. ശാരീരികക്ഷമതയും വർദ്ധിക്കും. ജീവിതത്തിന്റെ ചിട്ടയിൽ മാറ്റം വരും. ശരീരത്തിലുണ്ടാകുന്ന മാറ്റങ്ങൾ നമുക്ക് നേരിട്ട് അറിയാൻ കഴിയുമെന്നും” നോനു പറയുന്നു.
