ബെംഗളൂരു: കർണാടകയിലെ കൊല്ലൂരിന് സമീപം ജാഡ്കാലിൽ ബസ് മറിഞ്ഞുണ്ടായ അപകടത്തിൽ നിരവധി പേർക്ക് പരിക്ക്. ഋഷഭ് ഷെട്ടി സംവിധായകനും നായകനുമായെത്തിയ ബ്ലോക്ബസ്റ്റർ സിനിമയായ കാന്താരയുടെ പ്രീക്വൽ ജോലികൾ ചെയ്യുന്ന ജൂനിയർ ആർട്ടിസ്റ്റുകളാണ് അപകടത്തിൽപ്പെട്ടത്. ഇന്നലെ രാത്രിയോടെയായിരുന്നു സംഭവം.
മൂഡൂരിലെ ചിത്രീകരണം പൂർത്തിയാക്കി കൊല്ലൂരിലേക്ക് മടങ്ങുന്നതിനിടെയായിരുന്നു അപകടം. ജൂനിയർ ആർട്ടിസ്റ്റുകൾ സഞ്ചരിച്ച മിനിബസ് സ്കൂട്ടറുമായി കൂട്ടിയിടിക്കുകയായിരുന്നു. ഇതോടെ നിയന്ത്രണം വിട്ട ബസ് മറിഞ്ഞുവീണു.
അപകടത്തിൽ പരിക്കേറ്റവരെ ആശുപത്രിയിൽ പ്രവേശിപ്പിച്ചു. ഇവരുടെ പരിക്ക് ഗുരുതരമല്ലെന്നാണ് വിവരം. സംഭവത്തിൽ അന്വേഷണം ആരംഭിച്ചതായി പൊലീസ് പറഞ്ഞു. അതേസമയം കാന്താരയുടെ രണ്ടാം ഭാഗം 2025 ൽ റിലീസാവുമെന്നാണ് വിവരം. ഉഡുപ്പിക്ക് സമീപത്തെ തീരദേശമേഖലകളിലാണ് ഇപ്പോൾ ഷൂട്ടിംഗ് പുരോഗമിക്കുന്നത്.
